გორის მუნიციპალიტეტის სოფელ ბერშუეთში, რამდენიმე საათის წინ ოსი ეროვნების პირებმა სოფელ ბერშუეთის მკვიდრის, გიორგი ხოდელის მიწის ნაკვეთის, დაახლოებით 32 ჰექტარი ტერიტორიის დამუშავება დაიწყეს.

აღნიშნული ფაქტი თვითმხილველებმა ხოდელს შეატყობინეს. ბერშუეთის მკვიდრმა მათ აუხსნა, რომ მათ არ აქვთ ამ მიწის ფართობის დამუშავების უფლება, რადგან ეს ტერიტორია მის მფლობელობაში შედის, რის შემდეგაც ოსმა მოქალაქეებმა სამუშაოები მიატოვეს.

მათ ორი ჰექტარი მიწის ფართობის დამუშავება შეძლეს, თუმცა, ხოდელი ვარაუდობს, რომ მსგავსი ქმედებები ხვალ კვლავ გაგრძელდება და სეპარატისტები აღნიშნულ მიწასაც მიითვისებენ.

გიორგი ხოდელის ტერიტორიაზე გამოჩენილი ოსი სეპარატისტები ხოდელთან საუბრისას აღნიშნავდნენ, რომ ისინი სოფელ წინაგარიდან გამოგზავნეს. აღსანიშნავია, რომ წინაგარი ოკუპანტების მიერ კონტროლირებადი ტერიტორიაა. ხოდელმა აღნიშნული ფაქტი გორის მუნიციპალიტეტის გამგეობას შეატყობინა.

გამგეობის წარმომადგენლები ადგილზე ჩასვლას ხვალ გეგმავენ. ბერშუეთის რწმუნებული „ნიუპოსტთან“ საუბრისას ადასტურებს, რომ გიორგი ხოდელის მიწის ფართობი ქართული მხარის მიერ კონტროლირებად ტერიტორიაში შედის და ოკუპანტებსსა და სეპარატისტებს მასზე არავითარი ძალაუფლება არ აქვთ.

გიორგი ახალკაცი, „ნიუპოსტი“, გორი.

შენიშვნა: ფოტო გადაღებულია სოფელ დვანში და გამოყენებულია ფოტოილუსტრაციის სახით.