სასტუმრო „რადისონ ბლუ ივერიაში“ სასულიერო პირები, უცხოელი დიპლომატები და ხელისუფლების წარმომადგენლები ვახშამზე დაახლოებით 22:00 საათამდე იმყოფებოდნენ.

ინფორმაცია სასულიერო პირების, დიპლომატებისა და პარლამენტის წევრების ვახშმის შესახებ „ნეტგაზეთმა“ გაავრცელა, რომელიც აღნიშნავს, რომ ვერ გაარკვია, ვის მიერ იყო დაფინანსებული და რა თანხა დაჯდა აღნიშნული ვახშამი.

გამოცემა ასახელებს ვახშამზე დამსწრე პირებს და აქვეყნებს მათ ფოტოებს, ასევე ვიდეოს, თუმცა, მასლაში აღნიშნავს, რომ ღონისძიება მედიისთვის დახურული იყო.

„რამდენიმე სტუმარმა "რედისონში" "ნეტგაზეთს" განუცხადა, რომ ისინი ვახშამზე საქართველოს მართლმადიდებელი ეკლესიის წარმომადგენელმა გიორგი ზვიადაძემ მიიწვია. პროტოპრესვიტერი გიორგი ზვიადაძე თბილისის სასულიერო აკადემიისა და სემინარიის რექტორია.

ვახშამს ასევე ესწრებოდა გიორგი ანდრიაძე, საპატრიარქოს ყოფილი საპარლამენტო მდივანი. მიღებას საზოგადოების სხვა ცნობილ სახეებთან ერთად ესწრებონდნენ, აშშ–ს ელჩი საქართველოში რიჩარდ ნორლანდი, ევროკავშირის ელჩი ფილიპ დიმიტროვი, ისრაელის ელჩი – იუვალ ფუქსი და საქართველოში აკრედიტებული სხვა საელჩოების წარმომადგენლები,  საქართველოს ყოფილი საგარეო საქმეთა მინისტრი გელა ბეჟუაშვილი, ასევე საპარლამენტო უმრავლესობის წევრები, მათ შორის ადამიანის უფლებათა დაცვის და სამოქალაქო ინტეგრაციის კომიტეტის თავმჯდომარე ეკა ბესელია და მისი პირველი მოადგილე, გედევან ფოფხაძე.

გიორგი ზვიადაძემ ამ საკითხზე ნეტგაზეთთან საუბარი არ ისურვა: 

"არაფერი აქ არ ხდება, გიორგობას გილოცავთ”, - განაცხადა სასულიერო პირმა“, - აღნიშნავს გამოცემა.

"ნეტგაზეთის" ფოტო