ახმეტაში, სოფელ ოჟიოში, 3 ივნისს მომხდარი ავტოსაგზაო შემთხვევაზე გამოძიება 4 თვეა მიმდინარეობს.

ადგილობრივების ცნობით, ავტომობილი რომელის მძღოლმა სავარაუდოდ ვერ დაიმორჩილა ჯერ განათების ბოძს შეეჯახა, შემდეგ კი ერთ-ერთი სახლის ღობე დააზიანა. შემთხვევისას მანქანაში სამი ახალგაზრდა იმყოფებოდა, ერთი 21 წლის ცოტნე ხარატიშვილი ადგილზე დაიღუპა. იგი გურჯაანის რაიონული სასამართლოს მოსამართლის ნუნუ ნემსიწვერიძის შვილი იყო.

მომხდარზე დაკავებულია 21 წლის შმაგი რამაზაშვილი, რომელიც მანქანას მართავდა.

მოსამართლე ნუნუ ნემსიწვერიძე გომელაურის უწყების თანამშრომლებს უპირისპირდება -მას შვილის დაღუპვის ოფიციალური ვერსიის არ სჯერა და ეჭვობს რომ 21 წლის ცოტნე ხარატიშვილი ჯერ მოკლეს, შემდეგ კი ავარიის ინსცენირება მოაწყვეს.

შესაბამისი განცხადებით ნუნუ ნემსიწვერიძემ თელავის რაიონულ პროკურატურას 25 აგვისტოს მიმართა.

მოსამართლე ნემსიწვერიძე გამომძიებლების დაკითხვას და იმ პირების სატელეფონო ზარების შემოწმებას სთხოვს, ვინც განცხადებაში ჰყავს მითითებული.