ვაკის საარჩევნო ოლქში მაჟორიტარი დეპუტატობის კანდიდატებს შორისაა პარტია "რეფორმერის" წევრი მაია კუკავა, პროფესიით ფინანსისტი, მოპოვებული აქვს კავკასიის უნივერსიტეტის კავკასიის სამართლის სკოლის მაგისტრის ხარისხი კერძო სამართლის სპეციალობით და ჯორჯ ვაშინგტონის უნივერსიტეტის მაგისტრის ხარისხი პროექტების მართვაში. მაია კუკავა მუშაობდა საერთაშორისო ბანკ HSBC Bank Georgia -ში, იკავებდა ფინანსური და საოპერაციო დეპარტამენტის აღმასრულებლის პოზიციას; იყო ევროკავშირის დაფინანსებული პროექტების ფინანსური მენეჯერი იუსტიციის სამინისტროს დაქვემდებარებაში არსებულ სსიპ სახელმწიფო სერვისების განვითარების სააგენტოში, ამერიკულ-უკრაინული პროექტის ფინანსური დირექტორი, არის ბავშვთა შემეცნებითი ცენტრი ვინგსის დამფუძნებელი და ხელმძღვანელობს კომპანია "ვაისს".

- რატომ გადაწყვიტეთ პოლიტიკაში ჩართვა და რატომ გახდით პარტია "რეფორმერის" წევრი?

_ ყოველთვის ვიყავი აქტიური მოქალაქე. ვხედავდი იმ პრობლემებს, რაც ხელს უშლიდა ჩემი ქვეყნის განვითარებას და წარმატებას. ვიცი ის სირთულეები, რაც არის კერძო სექტორში ბიუროკრატიული ბარიერების და არასწორი საკანონმდებლო ცვლილებების გამო. ეს ძალიან ართულებს ადამიანების ცხოვრებას, ამ ბარიერების გადალახვა მეც ბევრჯერ მომიხდა. უნდა შეიცვალოს ის გარემო, რაც არის დღეს ქვეყანაში. ეს არის ჩემი პოლიტიკაში ჩართვის ერთ-ერთი მთავარი მოტივაცია.

"რეფორმერი" არის პოლიტიკური ძალა, რომელიც მაძლევს ამ შესაძლებლობას. ბოლო პერიოდში განვითარებულმა მოვლენებმა, არსებულმა მძიმე ეკონომიკურმა და სოციალურმა მდგომარეობამ კიდევ უფრო ნათლად დაგვანახა, რომ ცვლილებების დროა. ახლა განსაკუთრებით საჭიროა ახალი სახეების ჩართვა პოლიტიკაში და ახალი პოლიტიკური სტანდარტის დამკვიდრება. ჩვენ ყველა ერთად ვიმსახურებთ, რომ თავად ვიყოთ ცვლილებების მომტანი ჩვენი ქვეყნისთვის, რომ საქართველოში ცხოვრება იყოს ღირსეული და საამაყო.

- რა ინიციატივების განხორციელებას აპირებთ კონკრეტულად ვაკის საარჩევნო ოლქში?

_ ვაკის საარჩევნო ოლქში მაცხოვრებელ ადამიანებს განსხვავებული პრობლემები აქვთ, თუმცა არის პრობლემები რომლებიც ყველას ერთნაირად ეხება, მაგალითად, ეკოლოგიური და ურბანული. ბოლო წლებში ვაკის რაიონი დეველოპერების განსაკუთრებული ყურადღების ცენტრში მოექცა, შენდება უამრავი საცხოვრებელი კორპუსი, ქაოტური მშენებლობები იწვევს ეკოლოგიურ და ურბანულ პრობლემებს. ვიწრო ქუჩებზე გაშენებული ახალი მაღალსართულიანი კორპუსები არ არის დაკმაყოფილებული საკმარისი საპარკინგე ადგილებით, რაც იწვევს ავტომანქანების გაჩერებას ქუჩაში, ამას ემატება ავტომობილების სხვა ნაკადი და იქმნება სატრანსპორტო კოლაფსი.

ვაკის ოლქში არსებული რეკრეაციული ზონები, მათ შორის მზიური, ვაკის პარკი და სხვა სკვერები, ფაქტობრივად აღარ ყოფნის ახალ განაშენიანებას, მაცხოვრებელთა გაზრდილ რაოდენობას, რაც იწვევს ჰაერის დაბინძურების მაღალ მაჩვენებელს ვაკის რაიონში და რაც ბოლო პერიოდში, საგრძნობლად შესამჩნევია.

მოსახლეობასთან შეხვედრებზე პრობლემატურ საკითხად გამოიკვეთა საჯარო სკოლამდელი აღზრდის დაწესებულებების და სკოლების ნაკლებებობა. ეს პრობლემაც გაზრდილი მშენებლობებით არის გამოწვეული, რაც ბევრი ოჯახისთვის არის პრობლემა და დამატებითი ხარჯი. ჩვენი პარტიისთვის ძალიან მნიშვნელოვანია განათლების მიმართულება. "რეფორმერის" ხედვა ყველა სფეროში განათლებას ეფუძნება, შესაბამისად, ჩვენთვის ძალიან მნიშვნელოვანია ამ საკითხის მოგვარება.

ჩვენ უნდა დავიწყოთ რეფორმების გატარება ყველა სფეროში. "რეფორმერი" ქმნის ახალ შესაძლებლობებს და რეალობას, სადაც თითოეული ჩვენგანი იპოვის საკუთარ თავს და შრომით, ძალისხმევით მივიღებთ იმ შედეგს, რაც მოგვცემს სტაბილურად განვითარების საშუალებას.