პოლიტიკური პარტია "რეფორმერი" გამოდის ინიციატივით, ტრადიციულ საარჩევნო სისტემასთან ერთად დაინერგოს ელექტრონული არჩევნების მოდელი, რომელიც არ იძლევა არჩევნების გაყალბების საშუალებას.

პარტია "რეფორმერის" თავმჯდომარის თორნიკე ჯანაშვილის განცხადებით, არჩევნების ელექტრონული სისტემა ტექნიკურად უფრო მოსახერხებელია ამომრჩევლისთვის.

როგორც პარტია "რეფორმერში" აცხადებენ, ყველა არჩევნების დროს ჩვენი მოქალაქეები დგებიან ერთი და იგივე პრობლემის წინაშე. მათ უწევთ საარჩევნო უბნებზე მისვლა და ხმის მიცემა ფაქტობრივი საცხოვრებელი ადგილებიდან მოშორებით. ეს არის პრობლემა სტუდენტებისთვისაც, რომლებიც უნდა ჩავიდნენ რეგიონებში, რაც მათთვის დაკავშირებულია ზედმეტ ხარჯებთან.

იგივე სირთულეები არსებობს უცხოეთში მცხოვრები საქართველოს მოქალაქეებისთვისაც. რომელთაც საკმაოდ დიდი მანძილის გავლა უწევთ საარჩევნო უბნებზე მისასვლელად და ხმის მისაცემად.

თორნიკე ჯანაშვილი: ელექტრონული არჩევნების ამ მოდელს ევროპულ ქვეყნებში დიდი პრაქტიკა აქვს. განსაკუთრებით მნიშვნელოვანია ესტონური მოდელი, რომელიც წლების წინ დაინერგა და ეფექტურად მუშაობს.

ელექტრონული არჩევნების სისტემა, იმის გარდა, რომ იცავს ამომრჩევლის ხმას გაყალბებისგან, არჩევნებს ხელმისაწვდომს გახდის უფრო მეტი ამომრჩევლისთვის და უფრო მეტი ახალგაზრდის ჩართულობას მოიტანს ამ პროცესში, რაც ძალიან მნიშვნელოვანია ჩვენი ქვეყნის განვითარებისთვის. ამ ინიციატივის განსახორციელებლად საჭირო იქნება საკანონმდებლო ცვლილებები და რა თქმა უნდა, ხელისუფლების ნება.

როგორც ვიცით, ამ სისტემის დანერგვაზე საუბარი დიდი ხნის წინ დაიწყო. ჩვენ მოვუწოდებთ ხელისუფლებას, დააჩქაროს ეს პროცესი" - აცხადებს პარტია "რეფორმერის" თავმჯდომარე თორნიკე ჯანაშვილი.