ხელისუფლების ოპონენტებმა განიხილეს ისეთი საკითხები, რომლებიც არჩევნების გამჭვირვალობას ეჭვქვეშ აყენებს და ამომრჩევლის ხმებს გაყალბების საფრთხეს უქმნის.

ოპოზიციური პარტიების ლიდერები დაუშვებლად მიიჩნევებ ცენტრალური საარჩევნო კომისიის მიერ მიღებულ ნორმატიულ აქტებს, რომლებიც აფერხებს საარჩევნო უბნებზე მუშაობას და მათ წარმომადგენლებს დარღვევების აღმოფხვრის საშუალებას არ აძლევს.

შეხვედრაზე განხილული იქნა ასევე ლევან ხაბეიშვილის საარჩევნო შტაბზე მომხდარი თავდასხმისა და ოზურგეთის საარჩევნო ოლქში მომხდარი ინციდენტები. ამ უკანასკნელის გათვალისწინებით, ოპოზიციის წარმომადგენლები მოითხოვენ ოზურგეთის საარჩევნო ოლქის თავმჯრომარის ბერდია ლომიძის თანამდებობიდან გათავისუფლებას, რომელმაც პოლიციის ძალის დახმარებით „ნაციონალური მოძრაობის“ წარმომადგენელი საარჩევნო ოლქიდან გააძევა:

„დღეს იმართება ცენტრალური საარჩევნო კომისიის სხდომა, რომელსაც დაესწრება დავით მჟავანაძე. ეს ის პირია, რომელიც ოზურგეთის საარჩევნო ოლქიდან გააძევეს. ჩვენ დიდი იმედი გვაქვს, რომ ცესკოს აღნიშნული სხდომა გახდება ბერდია ლომიძის გათავისუფლების საფუძველი. ეს არის ჩვენი მოთხოვნა და ეს იქნება ერთადერთი მართებული ნაბიჯი, რაც კი შეუძლია, რომ გადადგას დღეს თამარ ჟვანიამ. ნებისმიერი სხვა ტიპის ვითომ დისციპლინარული მოქმედებები, რომლებიც შემოიფარგლება მხოლოდ და მხოლოდ გაფრთხილებითა და თითის დაქნევით, რა თქმა უნდა, იქნება საზოგადოებისთვის თვალებში ნაცრის შეყრა და არ იქნება პროპორციული იმ მოქმედების მიმართ, რაც განახორციელა ბერდია ლომიძემ. იმედი მაქვს, რომ თამარ ჟვანია გადადგამს რეალურად იმ ნაბიჯებს, რომელიც იქნება სიგნალი საზოგადოებისთვის, რომ მას სურს იყოს არჩევნების ნეიტრალური არბიტრი და არა ბიძინა ივანიშვილის გაყალბების ინსტრუმენტი ამ უმნიშვნელოვანეს არჩევნებში“ - განაცხადა „ერთიანი ნაციონალური მოძრაობის“ წევრმა თინა ბოკუჩავამ.