"ვიოლა ფონ კრამონს აზრს შევაცვლევინებთ და მივახვედრებთ, რომ ამ შეფასებაში ცდება"- "ოცნება" ევროპარლამენტდან ივანიშვილის კრიტიკამ გააღიზიანა

პოლიტიკა - 13:21, 15 Sep, 2020

978

„მილიარდერი ივანიშვილის ჩრდილოვანი მმართველობა საფრთხეს უქმნის დემოკრატიას" - ევროპარლამენტარ ვიოლა ფონ კრამონის უმწვავეს პოლიტიკურ გზავნილს "ქართულ ოცნებაში" აფასებენ.

"დარწმუნებული ვარ, რომ ქალბატონ ვიოლა ფონ კრამონსაც ამ აზრს მალე შევაცვლევინებთ და მივახვედრებთ, რომ ამ შეფასებაში ცდება", - უთხრა ჟურნალისტებს საქართველოს პარლამენტის ვიცე-სპიკერმა კახა კუჭავამ საკითხის კომენტირებისას.

კუჭავამ კრიტიკული განცხადებების სიმცირეზე ისაუბრა და თქვა, რომ "ერთი წლის წინ ასეთი გზავნილები უფრო მეტი იყო".

კახა კუჭავას თქმით, ოპოზიცია ცდილობს, მათი მომხრეების მხრიდან გაკეთებული „ერთი-ორი კრიტიკული ნათქვამით“ გადაფარონ ის დიდი პოზიტივი, რაც ანგარიშს აქვს.

როგორც კუჭავამ აღნიშნა, ძალიან უნდა ეცადო, რომ ევროპარლამენტში დებატები და აშშ-ის სახელმწიფო დეპარტამენტის ანგარიში როგორმე ნეგატიურში გაიყვანო.

„ამას მიუთითებს ის განცხადებები, ვინც დებატებისას გამოვიდა და განაცხადა, თუ რამდენად მნიშვნელოვანია ის რეფორმები, რომელიც განახორციელა საქართველოს ხელისუფლებამ, თუ რამდენად დიდია მიღწევები, რომელიც ამ გზაზე ქვეყანამ გაიარა. რაც ყველაზე მთავარი იყო, საინტერესო კომენტარი იყო, რომ საქართველო იმსახურებს და ძალიან მალე უნდა გახდეს ევროკავშირის წევრი, ეს არის ის მთავარი პოზიტიური გზავნილები, რომელიც მივიღეთ. რა თქმა უნდა, იყო შენიშვნები და მოსაზრებები, რომ კონკრეტული მიმართულებების გათვალისწინებით საქართველომ უნდა გააძლიეროს რეფორმები, მათ შორის მართლმსაჯულების თვალსაზრისით. იყო ორი პარლამენტარი კრიტიკული გზავნილებით, მაგრამ 700 ევროპარლამენტარიდან ორის კრიტიკული განცხადება და სურვილი, რომ გარკვეული მიმართულებით შეიძლება უკეთესი გაკეთებულიყო, არათუ მისაღებია, აუცილებელია გავითვალისწინოთ და ვიმსჯელოთ, თუ რა შეიძლება გაუმჯობესდეს.

სასამართლოსთან დაკავშირებით მოვისმინეთ ასევე საინტერესო განმარტება ამერიკის სახელმწიფო დეპარტამენტის ანგარიშში, სადაც ნახსენებია, რომ იმ რეფორმებს მიესალმებიან, რომელიც განახორციელა საქართველოს ხელისუფლებამ, თუმცა ისურვებენ, რომ რეფორმების ტალღა არ შეწყდეს და კიდევ უფრო მეტი უნდა გაკეთდეს, რომ სასამართლოს მიმართ ნდობა გაიზარდოს. სასამართლოს მეოთხე ტალღა ამ მოწვევის პარლამენტმა დაამტკიცა, მთავარია ახლა, ეს ზუსტად იყოს აღსრულებული და უფრო მეტი მიღწევები იყოს", - განაცხადა კახა კუჭავამ.