ამიტომ არის ცუდი მთავრობა კრიზისის დროს კიდევ უფრო უარესი

ამიტომ არის ცუდი მთავრობა კრიზისის დროს კიდევ უფრო უარესი - ოთარ კახიძე

პოლიტიკა - 17:28, 12 Sep, 2020

779

ევროპული საქართველოს მაჟორიტარობის კანდიდატი ქუთაისში, ოთარ კახიძე, გაუარესებულ ეპიდვითარებას და მთავრობის რეაგირებას ეხმაურება.

ოთარ კახიძის თქმით, ხელისუფლებამ დააპაუზა ეკონომიკა, მხოლოდ იმის გამო, რომ შეეჩერებინათ ეპიდემია, თუმცა როგორც აღმოჩნდა მთავრობას ეპიდვითარება გაექცა. კახიძემ აღნიშნა, რომ ეკონომიკის დაპაუზების გამო, ქუთაისი და მთლიანი საქართველო უმძიმეს ეკონომიკურ კრიზისშია. კახიძემ აღნიშნა, რომ სწორედ 31 ოქტომბერს ხალხმა უნდა გაისტუმროს არაკომპეტენტური მთავრობა და შემდეგში, გონივრული რეგულაციებით, უნდა აღდგეს ეკონომიკა და ამვდროულად, გამართულად უნდა იმუშაოს ჯანდაცვის სისტემამ.

„ამ წლის გაზაფხულზე, ქოცებმა მთელი ქვეყანა გააჩერეს, ათიათასობით სამუშაო ადგილი გააუქმეს, ეკონომიკა მინუსებში გაუშვეს, პრაქტიკულად გაანადგურეს ტურიზმის სექტორი.

ქუთაისში რეგულარული ფრენები გააუქმეს, ვიზეარი აიძულეს, რომ ადგილობრივი ბაზა დაეხურა, ტურისტი ქალაქში აღარ არის, სასტუმროების თანამშრომლები, გიდები, თარჯიმნები, მძღოლები და ა.შ. - შემოსავლის გარეშე, ბანკის ვალების პირისპირ არიან დარჩენილი.

და ეს ყველაფერი, როგორც აღმოჩნდა - სულ ტყუილად, მაინც გაექცათ ეპიდვითარება.

ამიტომ არის ცუდი მთავრობა კრიზისის დროს კიდევ უფრო უარესი.

კორონა ვირუსი ჩვენ გვერდით იქნება და მასთან ერთად უნდა ვისწავლოთ ცხოვრება. შემთხვევების მატება გარდაუვალია, ინფიცირებულთა უდიდესი ნაწილი საერთოდ უსიმპტომოდ და ყოველგვარი დისკომფორტის გარეშე იხდის ვირუსს, მცირე ნაწილს კი ჰოსპიტალური სექტორი მოუვლის.

ვირუსისგან გამოწვეული სიკვდილიანობის მაჩვენებელი ძალიან დაბალია, მაგრამ მაინც უნდა გავუფრთხილდეთ მოხუცებსა და ქრონიკული დაავადებების მქონე ადამიანებს.

აქვე უნდა ითქვას, რომ უმუშევრობა, უსახსრობა და სიღარიბე კორონა ვირუსზე გაცილებით საშიშია ჩვენი მოქალაქეების ჯანმრთელობისა და სიცოცხლისათვის.

31 ოქტომბერს ეს მავნებელი და არაკომპეტენტური ხელისუფლება უნდა გავისტუმროთ. შემდეგ გონივრული რეგულაციებით ეკონომიკა უნდა გავხსნათ და პარალელურად, ჭკვიანურად უნდა ვმართოთ ჯანდაცვის სისტემა.

ყველას გისურვებთ ჯანმრთელობას და ჩვენი ქვეყნის მალე ამოყვანას ქოცური ჭაობიდან.“ - განაცხადა ოთარ კახიძემ.