ცენტრალურმა საარჩევნო კომისიამ ოთხ მუნიციპალიტეტში საკრებულოს შუალედური და ხუთ მუნიციპალიტეტში მერების რიგგარეშე არჩევნები დანიშნა.

როგორც მუნიციპალიტეტების საკრებულოების შუალედური, ისე მუნიციპალიტეტების მერების რიგგარეშე არჩევნები, საქართველოს პარლამენტის არჩევნებთან ერთად, 31 ოქტომბერს გაიმართება.

საკრებულოების შუალედური არჩევნები ქალაქ თბილისის, თელავის, თეთრიწყაროსა და ონის მუნიციპალიტეტების ადგილობრივ მაჟორიტარულ საარჩევნო ოლქებში, ჯამში 39 საარჩევნო უბანზე გაიმართება. მერების რიგგარეშე არჩევნები კი კასპის, ონის, ხარაგაულის, თერჯოლისა და ქუთაისის მუნიციპალიტეტებში, ჯამში 254 საარჩევნო უბანზე.

როგორც ცესკო-ს პრესსპიკერმა, ანა მიქელაძემ დღეს მედიას განუცხადა, საკრებულოს შუალედური, ასევე მერების რიგგარეშე არჩევნები საკრებულოს მაჟორიტარი დეპუტატებისა და მერებისთვის უფლებამოსილების ვადამდე შეწყვეტის გამო დაინიშნა.

მიქელაძის განცხადებით, ვინაიდან საქართველოს პარლამენტის საერთო და ადგილობრივი თვითმმართველობის წარმომადგენლობითი და აღმასრულებელი ორგანოების რიგგარეშე/შუალედური არჩევნები ერთდროულად 2020 წლის 31 ოქტომბერს გაიმართება, ცესკო-მ არჩევნებში ჩართული მხარეებისთვის განსაზღვრა ზოგიერთი საარჩევნო პროცედურა.

დღესვე, ცესკო-მ არჩევნებში მონაწილე საინიციატივო ჯგუფებისთვის მათ მიერ კანდიდატების წარსადგენად საჭირო ხელმოწერების მინიმალური ოდენობა დაადგინა.

დღევანდელ სხდომაზე ცესკო-მ როგორც საკრებულოების შუალედური, ისე მერების რიგგარეშე არჩევნებისთვის საარჩევნო ღონისძიებათა გრაფიკები დაამტკიცა, რომლებიც ხელმისაწვდომია ცესკო-ს ოფიციალურ ვებგვერდზე.

შეგახსენებთ, საკრებულოების შუალედურ და მერების რიგგარეშე არჩევნებში მონაწილეობის მიზნით, პოლიტიკურ პარტიებსა და საინიციატივო ჯგუფებს უკვე შეუძლიათ, შესაბამის საარჩევნო ადმინისტრაციას განცხადებით მიმართონ და რეგისტრაცია გაიარონ.