გოცირიძე: ინვესტიციების კლების მმთავარი მიზეზი არაპროგნოზირებადი გარემო და ბიზნესისადმი პოლიტიკური პრეფერენციებია

პოლიტიკა - 16:27, 10 Sep, 2020

939

2020 წლის საინვესტიციო კლიმატის შესახებ აშშ-ს სახელმწიფო დეპარტამენტის ანგარიშს "ნიუპოსტთან" ეხმაურება ფრაქცია „ერთიანი ნაციონალური მოძრაობის“ თავმჯდომარე რომან გოცირიძე და აღნიშნავს, რომ ქვეყანაში, სადაც სამართლიანი სასამართლო არაა, ინვესტორი შემოსვლისგან თავს იკავებს.

„საინვესტიციო კლიმატი როგორ შეიძლება გაუმჯობესდეს, როდესაც თავად ამერიკულ კომპანიას, რომლის დამფუძნებლები ამერიკელი და უკრაინელი დამფუძნებლები არიან, მთავრობამ ფაქტობრივად ქონება ჩამოართვა. ესაა ერთ-ერთი ყველაზე დიდი ინვესტიცია საქართველოში. ეს ეხება ფეროს და მანგანუმს და ეკოლოგიური საკითხების საბაბით 3 წლიანი დროებითი მმართველი შეიყვანა მთავრობამ. რის შედეგადაც სხვის ქონებას როგორც საკუთარს, ისე განაგებს. ეს პროცესი რამდენიმე კვირის წინ კიდევ 3 წლით გახანგრძლივდა. ანუ, ინვესტორს, 6 წელი ქონება ფაქტობრივად წაართვეს.

იქ, სადაც სამართლიანი სასამართლო არ არსებობს და ივანიშვილის კანონი მუშაობს; იქ, სადაც ვერავინ თავის სისმართლეს ვერ დაამტკიცებს თუ მას დავა ივანიშვილთან ან მის გარემოცვასთან ექნება, ინვესტორი შემოსვლისგან რა თქმა უნდა თავს შეიკავებს.

ბოლო პერიოდში მომხდარი ფაქტები ბიზნესის დევნის, კიდევ უფრო მძიმე მდგომარეობაში აყენებს ქვეყანას უცხოური ინვესტიციების მოზიდვის კუთხით.

რაც შეეხება, ანაკლიის პორტის მშენებლობის გაჩერებას, ეს იყო ყველაზე უხეში, თავხედური ფორმით უზამაზარი მნიშვნელობის მქონე პროექტის გაჩერება, სადაც პირდაპირ იკითხებოდა რუსეთის ინტერესები. ინვესტიციების კლების ერთერთი მმთავარი მიზეზი სწორედ არაპროგნოზირებადი გარემო და ბიზნესისადმი პოლიტიკური პრეფერენციებია"- აცხადებს გოცირიძე