"ხელისუფლებამ ისე გაანიავა მილიონობით ლარი, რომ დღეს სკოლები სანიტარულ-ჰიგიენური ნორმების ელემენტარულ სტანდარტს ვერ აკმაყოფილებენ"

"ხელისუფლებამ ისე გაანიავა მილიონობით ლარი, რომ დღეს სკოლები სანიტარულ-ჰიგიენური ნორმების ელემენტარულ სტანდარტს ვერ აკმაყოფილებენ" - ნინო კვიტაიშვილი

პოლიტიკა - 15:38, 10 Sep, 2020

870

"სასწრაფო და გადაუდებელი ზომების გატარების ნაცლად, ხელისუფლებამ ისე გაანიავა მილიონობით ლარი, რომ დღეს სკოლები სანიტარულ-ჰიგიენური ნორმების ელემენტარულ სტანდარტს ვერ აკმაყოფილებენ" - ასე ეხმაურება ერთიანი ნაციონალური მოძრაობის წარმომადგენელი ნინო კვიტაიშვილი 81 სკოლის მიერ ჯანდაცვის სამინისტროს მოთხოვნებების ვერ დაკმაყოფილებას.

"შრომის პირობების ინსპექტირების დეპარტამენტის უფროსის, ბექა ფერაძის განცხადებით, ამ დროისთვის შემოწმებული 1500-მდე სკოლიდან, კორონავირუსის პრევენციის მიზნით ჯანდაცვის სამინისტროს მიერ შემუშავებულ მოთხოვნებს 81 სკოლა ვერ აკმაყოფილებს.

სწავლის გაგრძელების ნებართვა ამ ეტაპზე მხოლოდ 614 სკოლას მისცეს.

სასწავლო პროცესი უკვე მე-7 თვეა შეჩერებულია. ჩვენ არაერთხელ მოვუწოდეთ ხელისუფლებას მთელი რესურსი ყველაზე პრიორიტეტული, ბავშვთა უსაფრთხოების უზრუნველყოფისკენ მიემართა, რათა სკოლებს სწავლის გაგრძელება შეძლებოდათ.

სასწრაფო და გადაუდებელი ზომების გატარების ნაცლად, ხელისუფლებამ ისე გაანიავა მილიონობით ლარი, რომ დღეს სკოლები სანიტარულ-ჰიგიენური ნორმების ელემენტარულ სტანდარტს ვერ აკმაყოფილებენ.

ჯერ კიდევ რამდენიმე თვის წინ, როცა განათლების ბიუჯეტი 127 მილიონი ლარით შემცირდა, ფრაქციის სხდომაზე ჩვენ ეკონომიკის მინისტრს ვკითხეთ იქნებოდა თუ არა უზრუნველყოფილი სკოლებში ინფრასტრუქტურული, მათ შორის, სანიტარულ-ჰიგიენური პრობლემების მოგვარება. მან განაცხადა, რომ არსებული პრობლემები: საპირფარეშოების მოწესრიგება, წყლის მიწოდება და სხვა სანიტარულ-ჰიგიენური მწვავე და უმნიშვნელოვანესი საკითხები, სექტემბერში ფაქტობრივად გადაჭრილი იქნებოდა, რაც „ქართული ოცნების“ მორიგი ტყუილი აღმოჩნდა.

რაც შეეხება შერეული ფორმის, ანუ ნაწილობრივ დისტანციურ სასწავლო პროცესს, რასაც ასევე აანონსებს ხელისუფლება და რომელშიც განათლების სამინისტრომ წინა სასწავლო წელს კრახი განიცადა და ათასობით ბავშვი დარჩა განათლების მიღმა, ახლაც ისევ განწირულია წარუმატებლობისთვის, რადგან დღემდე ბავშვებისთვის ინტერნეტისა და ტექნიკური საშუალებების ხელმისაწვდომობის პრობლემა არ გადაჭრილა.

შესაბამისად, დისტანციური სასწავლო პროცესის მიღმა ათასობით მოსწავლე დარჩება, რაც რა თქმა უნდა, სოციალურ უთანასწორობასა და დისკრიმინაციას უსვამს ხაზს."- აცხადებს ოპოზიციონერი.