სიის ოცეულის წევრებზე და სიის მიღმა დარჩენილებზე "ნიუპოსტი" უკვე წერდა - როგორც ჩანს ოლიგარქმა ფსონი ოდიოზურ პოლიტიკურ ფიგურებზე გააკეთა თავად კი კულისებში დარჩენა ამჯობინა. რატომ? - ამის გარკვევას "ნიუპოსტი" პოლიტოლოგ გია ხუხაშვილთან შეეცადა.

ასევე ნახეთ: - "ოცნების“ სიაში ივანიშვილი არ არის - ვინ არიან ოლიგარქის რჩეულები

ვინ ვერ მოხვდა "ქართული ოცნების“ სიაში (ჩამონათვალი)

ექსპერტი ჩვენთან საუბარში ამბობს, რომ კონკრეტული პერსონების განხილვა „ქართული ოცნების“ სიის ჭრილში არ იქნებოდა სწორი, რადგან პარტიას ერთი ადამიანი, ბიძინა ივანიშვილი მართავს:

„მე არ მიმაჩნია, რომ მნიშვნელოვანია კონკრეტული პერსონების განხილვა „ქართული ოცნების“ ჭრილში, იმიტომ, რომ „ქართული ოცნება“ არის ერთი ადამიანი, დანარჩენი ყველაფერი ტყუილია.

რაც შეეხება გახარიას ნომერ პირველ კანდიდატობას, ის ალბათ იმიტომ არის სიის თავში, რომ ივანიშვილს უნდა თავისი რელიგიურ-მისტიური გზავნილი შეინარჩუნოს, რომ ის არსად არ არის, მაგრამ სინამდვილეში ყველა პოლიტიკურ პროცესებს მართავს.

„ქართული ოცნება“ ხომ რელიგიად ჩამოყალიბდა და შეიძლება, ღმერთი სიაში იყოს სადმე? აქედან გამომდინარე, ალბათ ამ ლოგიკით აირჩია გახარია პირველ ნომრად და საკუთარი თავი არ შეიყვანა სიაში“, - განაცხადა ხუხაშვილმა ნიუპოსტთან საუბარში.

ავტორი: ლილე შუკვანი