"წინასაარჩევნოდ ხელისუფლებამ სკოლის დირექტორების დასჯა გადაწყვიტა"

"წინასაარჩევნოდ ხელისუფლებამ სკოლის დირექტორების დასჯა გადაწყვიტა" - ნინო კვიტაიშვილი

პოლიტიკა - 17:54, 09 Sep, 2020

1695

"წინასაარჩევნოდ ხელისუფლება თავის ძველ მეთოდს მიმართავს და ამჯერადაც, სკოლის დირექტორების დასჯა გადაწყვიტა" - ასე ეხმაურება ერთიანი ნაციონალური მოძრაობის წარმომადგენელი ნინო კვიტაიშვილი სკოლის დირექტორების გათავისუფლებას.

მისივე თქმით, სკოლებთან დამშვიდობება მოუწიათ იმ

დირექტორებს, რომლებიც პროფესიონალები არიან, მაგრამ არა მორჩილები.

"განათლების სამინისტრო გენერალურ ინსპექციას, ეფექტურ სადამსჯელო იარაღად ვეღარ იყენებს მას შემდეგ, რაც ზუგდიდის მე-6 საჯარო სკოლის დირექტორ ია კერზაიაზე ზეწოლა განახორციელა და რასაც მძიმე შედეგი მოჰყვა. სწორედ ამიტომ, ახლა ახალი მიდგომა შეიმუშავა.

გუშინ სკოლის დირექტორებს, რომელთაც უფლებამოსილების 6-წლიანი ვადა ამოეწურათ, გათავისუფლების შესახებ შეტყობინებები დაეგზავნათ.

გამოცდილი და კვალიფიციური, მაგრამ არა მორჩილი, პროფესიონალები სკოლებს დაემშვიდობნენ, მაშინ, როცა მათსავე ზოგიერთ კოლეგას, სკოლის დირექტორის მოვალეობის შემსრულებლის თანამდებობაზე დასარჩენად განცხადების დაწერა შესთავაზეს.

შესაბამისად, განათლების სამინისტრომ, სკოლის დირექტორის მოვალეობის შემსრულებლებლის პოზიციაზე, მისთვის მისაღები კადრები დანიშნა/დატოვა" - აღნიშნავს კვიტაიშვილი და დასძენს, რომ

ეს გადაწყვეტილება არის სრულად დისკრიმინაციული და პოლიტიკურ ხასიათს ატარებს.

"გამოცდილ პროფესიონალთა სისტემიდან ჩამოშორება საჯარო სკოლებს, რომელთაც პრობლემები ისედაც უხვად აქვთ, დიდ ზიანს მიაყენებს.

თავისი ნაბიჯებით ხელისუფლება ყოველდღიურად გვიდასტურებს, რომ ხელმოცარულია და გარდაუვალი მარცხის მოლოდინში, ძალაუფლებას საჯარო სექტორიდან მისთვის მიუღებელი კვალიფიციური ადამიანების მორჩილი კადრებით ჩანაცვლებით ებღაუჭება"- ამბობს კვიტაიშვილი.