ევროპული საქართველოს წევრი დეპუტატი გიორგი კანდელაკი მთავრობის მიერ ქვეყანაში შემომსვლელთათვის კარანტინის რვა დღემდე შემცირებას გამოეხმაურა. კანდელაკის თქმით, გადაწყვეტილება საზოგადოების ზეწოლის შედეგადაა მიღებული და აჩვენებს რომ ორკვირიან კარანტინს მეცნიერული საფუძველი თავიდანვე არ ქონდა.

„ამავე დროს, გადაწყვეტილება ინარჩუნებს დისკრიმინაციულ კარანტინს უსაფრთხო ქვეყნებიდან მომავალი ჩვენი მოქალაქეებისთვის. აუცილებელია რომ დისკრიმინაცია გაუქმდეს და უსაფრთხოდ გამოცხადებული ქვეყნებიდან მომავალი ყველა ადამიანი დაექვემდებაროს ერთნაირ რეგულაციას,“ აღნიშნა კანდელაკმა.

მან ასევე მოუწოდა მთავრობას უსაფრთხო ქვეყნების სიაში შეიტანოს კარგი ეპიდსიტუაციის მქონე ისეთი ქვეყნები როგორებიცაა საბერძნეთი და პოლონეთი.

„ასევე მოვუწოდებთ მთავრობას ევროკავშირის დანარჩენი ქვეყნებიდან შესაძლებელი იყოს ქვეყანაში შემოსვლა 24 საათიანი კარანტინისა და რამდენჯერმე განმეორებადი ტესტით, ისევე როგორც აპრობირებულია მრავალ მათ შორის კარგი ეპიდსიტუაციის ქვეყნებში,“ აღნიშნა მან.

გიორგი კანდელაკმა მთავრობას ასევე მოუწოდა ავიაკომპანიებს, პირველ რიგში კი ვიზეარს, დაუყოვნებლივ მიეცეთ ნებართვა დაიწყონ რეგულარული უსაფრთხო ქვეყნებიდან - იმ დათქმით რომ მათ რიცხვში შეტანილი იქნებიან კარგი ეპიდსიტუაციის ქვეყნები.

დასასრულს კანდელაკმა კარანტინის მომსახურებაზე სასტუმროებთან გაფორმებულ გაუმჭვირვალე კონტრაქტებზე და კორუფციაზე ისაუბრა და აღნიშნა რომ გადასახადის გადამხდელთა ფული ხშირ შემთხვევაში ქართული ოცნების შემომწირველთა მფლობელობაში არსებულ სასტუმროებში ხვდება რაც უდავო კორუფციის ნიშნებს შეიცავს.