ევროპული საქართველოს საარჩევნო შტაბის ხელმძღვანელი, სერგი კაპანაძე დავით საგანელიძის განცხადებას ეხმაურება რუსეთთან ახალი გზის გახსნაზე.

სერგი კაპანაძის თქმით, საქართველოს ხელისუფლებამ ვერ ისწავლა ეროვნული ინტერესების დაცვა და მტრისა და მოყვარის გარჩევა. კაპანაძემ აღნიშნა, რომ ამგავრი პოლიტიკა უნდა შეიცვალოს, რასაც გარდამტეხი ცვლილებები სჭირდება.

„დავით საგანელიძის განცხადება არის კლასიკა იმისა, თუ როგორ ვერ ისწავლა საგარეო ურთიერთობები, როგორ ვერ ისწავლა ქვეყნის ეროვნული ინტერესების დაცვა ჩვენმა ხელისუფლებამ. ისინი ვერ ერკვევიან ვინ არის ქვეყნის მოყვარე და ვინ მტერი და ამდენი წლის მერეც საუბრობენ იმაზე, რომ რუსეთთან უნდა აღდგეს ახალი გზა და ახალი საფრთხეები უნდა გაჩნდეს. აი ეს არის ის ძველი მიდგომები, რომლებმაც ქვეყანა შეიყვანა გამოუვალ ჩიხში და რომელსაც სჭირდება გარდამტეხი ცვლილებები. აი ეს არის ის, რაც უნდა შევცვალოთ ჩვენ, რომ არც დავით საგანელიძემ, არც საგარეო საქმეთა მინისტრმა, არც პრემიერ მინისტრმა ასეთი სახის სამარცხვინო განცხადებები არ აკეთონ, ისევე არ იყოს კუდის ქიცინი და კოჭის გაგორება რუსეთისთვის. უნდა გამოვიდეთ ჩარჩოდან, რომ თუ ახალი გზებით არ დავუკავშირდით რუსეთს, მაშინ ჩვენი უსაფრთხოება და ჩვენი ეკონომიკური მდგომარეობა წინ ვერ წავა. წინ წავა და ჩვენ სწორედ ამიტომ გვჭირდება გარდამტეხი ცვლილებები, რომ ასეთი პოლიტიკა ერთხელ და სამუდამოდ ჩავაბაროთ წარსულს.“ - განაცხადა სერგი კაპანაძემ.