რამდენიმე მოსაზრება და დაკვირვება საქართველოს პრეზიდენტის ინაუგურაციის შესახებ

პოზიცია - 20:30, 20 Nov, 2013

2143

ამერიკულ დელეგაციას ხელმძღვანელობდა USAID-ის ადმინისტრატორი, რამაც თავისთავად ბევრი კითხვა გააჩინა. დელეგაციაში არ იყო არცერთი მძიმე პოლიტიკური წონის პოლიტიკოსი არც აღმასრულებელი და არც საკანონმდებლო ხელისუფლებიდან. ასეთი შემადგენლობის დელეგაციები ხშირად სტუმრობდნენ საქართველოს შევარდნაძის დროს, როდესაც ამერიკული მხარისთვის მთავარი ჰუმანიტარული და ფინანსური დახმარება იყო და არა პოლიტიკური მხარდაჭერა.

არჩეული პრეზიდენტი თავის გამოსვლაში ზედმეტად ლაკონური და ბუნდოვანი იყო. ამ გამოსვლიდან რაიმე კონკრეტული აზრის გამოტანა და პერსპექტივის პროგნოზირება შეუძლებელია. არავითარი მკვეთრი, კონკრეტული მესიჯები არც პოლიტიკური წრეებისთვის, არც ბიზნესის მიმართ და არც ინვესტორებისთვის არ გაჟღერებულა.

პრეზიდენტის გამოსვლის „უმარილობის“ გამო ინაუგურაციის მთავარი განსახილველი თემა მედიისთვის იყო არა გამოსვლის შინაარსი, არამედ მინისტრების ცოლების ჩაცმულობა და ქცევა.

ახალი ხელისუფლების რიტორიკამ არ დატოვა არანაირი შანსი, რომ ეს ღონისძიება ყოფილიყო ერის გაერთიანებისკენ გადადგმული ნაბიჯი, არამედ კიდევ უფრო გააღრმავა არსებული დაძაბულობა.