ნავთობპროდუქტების ექსპერტიზის ახალი ულტრათანამედროვე ლაბორატორია გაიხსნა

საზოგადოება - 16:46, 20 Nov, 2013

1487

დღეს სასამართლო ექსპერტიზის ეროვნულ ბიუროში ნავთობპროდუქტების ექსპერტიზის ახალი ლაბორატორია ოფიციალურად გაიხსნა.
ახალი ლაბორატორია უნიკალურია იმით, რომ მოიცავს ნავთობპროდუქტების ექსპერტიზის ყველა სფეროს. ლაბორატორიაში ხარისხის დადგენის მიზნით შესაძლებელია ანალიზის ჩატარება ნედლ და სასაქონლო ნავთობზე, საავტომობილო და რეაქტიულ საწვავზე, დიზელზე, სხვადასხვა დანიშნულების ახალ და ნამუშევარ ზეთებზე, საცხის-საპოხ მასალებზე, ბიტუმზე, ქვანახშირზე და სხვა თხევად/მყარ ნავთობპროდუქტზე. ლაბორატორიაში აგრეთვე შესაძლებელია წყლის და ნიადაგის ნავთობპროდუქტებით დაბინძურების ხარისხის დადგენა, საგან-მატარებელზე (ხანძარი, უბედური შემთხვევა და ა.შ) ნავთობპროდუქტების კვალის აღმოჩენა და მათი ჯგუფურ-გვარობრივი კუთვნილების დადგენა.
ახალი ლაბორატორია სტუმრებს ექსპერტიზის ეროვნული ბიუროს ხელმძღვანელმა გიორგი ხიზანიშვილმა დაათვალიერებინა და მისი შესაძლებლობები ადგილზე გააცნო.

ლაბორატორიის გახსნას დაესწრნენ საქართველოს რეგიონული განვითარებისა და ინფრასტრუქტურის, გარემოს დაცვისა და ბუნებრივი რესურსების და ენერგეტიკის სამინისტროების წარმომადგენლები, ნავთობპროდუქტების კომპანიების წარმომადგენლები და დიპლომატიური კორპუსის წევრები.
ახალი ნავთობპროდუქტების ექსპერტიზის ლაბორატორია ერთადერთი იქნება საქართველოში, რომელიც გააერთიანებს ნავთობპროდუქტების ექსპერტიზის ყველა სფეროს, რითაც გაუადვილებს მომხმარებელს ერთ სივრცეში მიიღოს მაღალკვალიფიციური, საერთაშორისო სტანდარტით აღიარებული დასკვნა.