ევროპული საქართველოს მაჟორიტარობის კანდიდატი გურჯაანის, საგარეჯოს, დედოფლისწყაროსა და სიღნაღის ოლქში, გიორგი ღვინიაშვილი, საგარეჯოელებს მიმართავს.

გიორგი ღვინიაშვილის თქმით, დღეს უკიდურესი სიღარიბეა, გაძვირებულია პროდუქტები, გაუფასურებულია ლარი, ამ დროს კი ადამიანები მიტოვებული არიან ხელისუფლებისაგან. გიორგი ღვინიაშვილი აღნიშნავს, რომ ცვლილებების გზა ოქტომბრის არჩევნებზე გადის და მოუწოდებს მოსახლეობას არჩევნებზე მისვლისაკენ.

„ჩემო საგარეჯოელებო, მე ვარ გიორგი ღვინიაშვილი და წარმოვადგენ ევროპულ საქართელოს ოქტომბრის საპარლამენტო არჩევნებზე საგარეჯოში. ქართული ოცნების 8 წლიანმა მმართველობამ ქვეყანა მიიყვანა სიღარიბემდე, ადამიანების უკიდურეს გაჭირვებამდე, ფასებისა და კრიმინალის ზრდამდე, ჯანდაცვისა და განათლების სისტემების ჩავარდნამდე.

დღეს ქვეყანაში ფასები ყველაფერზე იზრდება, თუმცა არ იზრდება ფასები თქვენ მიერ მოყვანილ პროდუქტზე, ყურძნის ფასი ყოველწელს იკლებს, განსაკუთრებით ამ გაუფასურებული ლარის პირობებში, დღეს გლეხი მიტოვებულია უპატრონოდ, ბედის ანაბარად. თქვენ ყველას გახსოვთ, ვისაც შეხება გქონიათ ყურძენთან და ქარხანასთან, ჩემი გუბერნატორობის პირობებში, 24 საათის განმავლობაში ვიდექი თქვენთან ერთად და ვიცავდი თქვენ უფლებებს.

ჩემი გამარჯვების შემთხვევაში, გპირდებით, რომ ვიქნები თქვენ გვერდით და არავის მივცემ უფლებას თქვენ დაგჩაგროთ. დღეს ბევრ ადამიანს რწმენა აქვს დაკარგული და განსაკუთრებით გულსატკენია, როდესაც ეს ახალგაზრდობას ეხება.ისინი ხშირად, ლუკმა-პურის საშოვნელად ტოვებენ თავიანთ ოჯახებს და მიდიან საზღვარგარეთ.

მე გპირდებით საგარეჯოელო ახალგაზრდებო, რომ თქვენ რაიონში იპოვით თქვენ ღირსეულ ადგილს. გექნებათ სამუშაო, შეკრებისა და გართობის ადგილები.

ბრძოლას აზრი აქვს, ჩვენ შეგვიძლია რომ ცუდი შევცვალოთ უკეთესით, ამიტომ მოდით არჩევნებზე, დამიჭირეთ მხარი და ერთად ვიცხოვროთ ძლიერ, მდიდარ და უსაფრთხო საქართველოში“- განაცხადა გიორგი ღვინიაშვილმა.