საქართველოს საპარლამენტო უმცირესობის წევრი ირმა ნადირაშვილი კიდევ ერთხელ გამოეხმაურა ირაკლი ღარიბაშვილის გუშინდელ ხუმრობას და პრემიერობის კანდიდატთან "ნათესაურ კავშირს" "ფეისბუქის" საკუთარ გვერდზე ვიდეო მიუძღვნა - ფრაგმენტი კინოფილმ "მონანიებიდან".

შეგახსენებთ, რომ გუშინ, საპარლამენბტო უმცირესობასთან შეხვედრისას ირაკლი ღარიბაშვილმა ტრიბუნაზე ასვლის შემდეგ, მისალმებისას, იუმორი მოიშველია, უმცირესობის წევრი ირმა ნადირაშვილი მოიკითხა და მას ნახევრადხუმრობით მიმართა:

„ქალბატონო ირმა, მე გავარკვიე, რომ ჩვენ ნათესავები ვყოფილვართ, ასე რომ, ან თქვენ უნდა დატოვოთ პარლამენტი, ან მე“;

რასაც ირმა ნადირაშვილმა უპასუხა:

„იქნებ, პირდაპირ შს მინისტრის პოსტი შემომთავაზოთ?“;

პასუხად ირაკლი ღარიბაშვილმა, ასევე ხუმრობით განაცხადა, რომ ამაზე ფიქრობდა:

„სხვათა შორის, თქვენზე ვფიქრობდი, მაგრამ...“;

„ჭიკაიძე უფრო ახლობელი აღმოჩნდა თქვენი, ხომ?“

„რა თქმა უნდა, ის უფრო ახლო ნათესავია და ის ავირჩიე“, - ხუმრობით დაასრულა დიალოგი პრემიერობის კანდიდატმა.