სააგენტო "დოსიეს" მიერ გავრცელებულ დოკუმენტირებულ ინფორმაციას, რომლის თანახმადაც, კრემლი 2020 წლის საპარლამენტო არჩევნებში პატრიოტთა ალიანსს პირდაპირ ეხმარება, "ერთიანი ნაციონალური მოძრაობის" წევრი, ხატია დეკანოიძე ეხმაურება.

ხატია დეკანოიძე აცხადებს, რომ იმ შემთხვევაში, თუ პარტია რეგისტრაციიდან არ მოიხსნება, ეს ქართული ოცნების პასუხისმგებლობა იქნება.

დეკანოიძის თქმით, პატრიოტთა ალიანსი პროპუტინისტური პარტია და ბიძინა ივანიშვილის ფავორიტია.

"ახალი ამბავი ნამდვილად არ არის. არც ის არ არის ახალი ამბავი, რომ პატრიოტთა ალიანსი პროპუტინისტური პარტიაა, არც ის არ არის ახალი ამბავი, რომ ქართული ოცნების წიაღიდან ამოსული პარტიაა, რომ ბიძინა ივანიშვილის საყვარელი ოპოზიციონერია ირმა ინაშვილი.

ქართული ოცნება უზრუნველყოფს იმას, რომ ოკუპირებულ ტერიტორიებზე ყოველგვარი დაბრკოლების გარეშე ჩადიან, მიდიან-მოდიან და მერე ყოველგვარი კარანტინის და იზოლაციის გარეშე დადიან ინაშვილი და თარხან-მოურავი.

იმ შემთხვევაში, თუ ისინი არ მოიხსნებიან რეგისტრაციიდან, ეს იქნება პირდაპირ ქართული ოცნების პასუხისმგებლობა", - ამბობს ხატია დეკანოიძე.