ნაკლები გადასახადი, მეტი ფული შენს ოჯახს - ევროპული საქართველო ეკონომიკურ გეგმას წარადგენს, რომლის მიხედვით თითოეულ ოჯახს 2000 ლარით მეტი დარჩება

პოლიტიკა - 18:23, 25 Aug, 2020

938

ევროპული საქართველო განაგრძობს საარჩევნო ეკონომიკური გეგმის წარდგენას.

დღეს პარტიამ წარადგინა ეკონომიკური გეგმის კიდევ ერთი, საკმაოდ მსხვილი ნაწილი, რომელიც მრავალ რეფორმას მოიცავს.

ევროპული საქართველოს თქმით, ამ გეგმით, თითოეულ ოჯახს დარჩება 2000 ლარით მეტი.

„ევროპული საქართველოს გეგმა: +2000 ლარი შენს ოჯახს.“

გეგმა მოიცავს გადასახადების მნიშვნელოვნად შემცირებას, მათ შორის:

საშემოსავლო გადასახადის დაწევა 20%-დან 10%-მდე.

მოგების გადასახადის დაწევა 15%-დან 10%-მდე

დამატებითი ღირებულების გადასახადის დაწევა 18%-დან 16%-მდე

მეტი მეწარმის განთავისუფლება დამატებითი ღირებულების გადასახადისგან. მეწარმე დამატებითი ღირებულების გადასახადს გადაიხდის, თუკი წლიური შემოსავალი ცდება 200 000 ლარს, ნაცვლად 100 000.

გეგმის მიხედვით, ეს მნიშვნელოვნად შეამცირებს უმუშევართა რაოდენობას.

გეგმა ასევე მოიცავს მთავრობის ხარჯების შემცირებას, რომლის მიხედვითაც, 2 მილიარდ ლარზე მეტი დარჩება ხალხს და არა ჩინოვნიკებს.

საწვავზე აქციზის შემცირება 25%-ით, რაც შეაფერხებს ფასების ზრდას.

მთავრობის საკუთრებაში არსებული მიწების ხალხისთვის დაბრუნება.

საკუთარი ფულის დაბრუნება საპენსიო ფონდიდან, მაშინ როცა ადამიანს სჭირდება.

აშშ-სთან თავისუფალი ვაჭრობის ხელშეკრულების გაფორმება.

ინვესტიციებისა და საერთაშორისო დახმარების მობილიზება.

ამ გეგმის მიხედვით თითოეულ ოჯახს დარჩება 2000 ლარით მეტი.

ევროპული საქართველოს საარჩევნო გეგმა, გარდა ეკონომიკური სფეროსი, მოიცავს სხვა სფეროებსაც, რომელსაც პარტია თანდათან აქვეყნებს.