„ნაციონალური მოძრაობის“ წევრმა თინა ბოკუჩავამ ოპოზიციური პარტიების შეხვედრის დასრულების შემდეგ კომენტარი გააკეთა.

ბოკუჩავა ამბობს, რომ ოპოზიციას უფრო მეტი რამ აერთიანებს, ვიდრე ჰყოფს.

მისი თქმით, „ნაციონალურმა მოძრაობამ“ თბილისში 6 მაჟორიტარული ოლქი დათმო, რათა ერთიანობა შენარჩუნებულიყო, ისნის ოლქთან დაკავშირებით კი, ბოკუჩავას ინფორმაციით, გადაწყვეტილება მიღებული არ არის.

„გადაწყვეტილება ამ კონკრეტულ ოლქთან დაკავშირებით მიღებული არ არის და თუ იქნება, ამას გავაჟღერებთ, მაგრამ დღევანდელმა დღემაც დაადასტურა, რომ ოპოზიციას უფრო მეტი რამ აერთიანებს, ვიდრე ყოფს.

დღეს იყო ერთი ძალიან მნიშვნელოვანი სტრატეგიული გადაწყვეტილება, რომელიც უზრუნველყოფს, რომ ვერ გააყალბოს ივანიშვილმა არჩევნები, მაგრამ ამას მოყვება სხვა მნიშვნელოვანი გადაწყვეტილებები, იქნება ქცევის კოდექსი არჩევნების, ასევე დოკუმენტი, რომელიც ცალსახას გახდის, რომ არცერთი ოპოზიციური პარტია არ შეუქმნის კოალიციურ მთავრობას ბიძინა ივანიშვილს. ამიტომ ეს კოორდინაცია, რომლისკენ ერთ-ერთი მნიშვნელოვანი ნაბიჯი გადაიდგა, გაგრძელდება და დარწმუნებული ვარ, დასრულდება იმით, რომ ივანიშვილი გადავა ოპოზიციაში თუ საერთოდ არ მოისურვებს, რომ პოლიტიკიდან წავიდეს, იმიტომ, რომ რთული წარმოსადგენია მისი პაიკებით ოპოზიციაში დარჩენა. ის ჩამოშორდება ხელისუფლებას და ხელისუფლებაში მოვა კოალიციური მთავრობა, რომელიც შედგენილი იქნება მათ შორის იმ ადამიანებისგან, რომელიც დღეს იყვნენ წარმოდგენილები“,- განაცხადა ბოკუჩავამ.