ევროპული საქართველოს საარჩევნო შტაბის ხელმძღვანელი, სერგი კაპანაძე, რუსეთ-საქართველოს ურთიერთობებსა და ქართული ოცნების პოლიტიკას აფასებს.

სერგი კაპანაძის თქმით, ყველა ის განცხადება, რომელიც მოდის რუსეთის ოფიციოზისაგან, მათ შორის ლავროვისგან, დიპლომატიური ურთიერთობების აღდგენაზე, რეალურად გულისხმობს, რომ ჩვენ უნდა ვაღიაროთ ცხინვალის რეგიონი და აფხაზეთი, როგორც დამოუკიდებელი სახელმწიფოები და მოვაწეროთ ხელი დიპლომატიური ურთიერთოების აღდგენას. რეალურად კი, დიპლომატიური ურთიერთობების დამყარება რუსეთთან ნიშნავს, რომ რუსეთმა უნდა სცეს პატივი ჩვენ ტერიტორიულ მთლიანობას, თუმცა ნათელია, რომ ამაზე ისინი თანახმა არ არიან.

სერგი კაპანაძე ასევე ეხმაურება „ქართული ოცნების“ პოლიტიკის ე.წ ნორმალიზაციას რუსეთთან. მისი თქმით, ეს პოლიტიკა დასრულდა სრული კრახით.

„ქართული ოცნების პოლიტიკა, რომ ე.წ ნორმალიზაცია მომხდარიყო რუსეთთან დამთავრდა სრული კრახით, ჯერ ერთი იმიტომ, რომ არცერთი პრობლემა რაც ეხება ცხინვალს და აფხაზეთს არ გადაჭრილა, მეორე იმიტომ, რომ ჩვენი მოქალაქეები კვლავ საფრთხის წინაშე არიან, ოთხოზორია, ტატუნაშვილი და ბაშარული ამის ნათელი მაგალითებია, კვლავ ხდება ტერიტორიების მიტაცება და ბორდერიზაცია და მავთულხლართების აგება, საქართველო გაქრა საერთაშორისო დღის წესრიგიდან და ჩვენი პარტნიორები აღარ ელაპარაკებიან რუსეთს ჩვენ პრობლემაზე, უფრო დამოკიდებული გავხდით რუსეთზე ენერგეტიკისა და ვაჭრობის მხრივ და საქართველოში გაძლიერედნენ პრორუსული ძალები. ეს თუ იყო ნორმალიზაცია, ამას ნამდვილად მიაღწია ივანიშვილმა. თუ ნორმალიზაციის მიზანი იყო, რომ კონკრეტული შედეგები მიგვეღო ან ტერიტორიული მთლიანობის, უსაფრთხოების ან ეკონომიკის მხრივ, მაშინ ამ შედეგეს მე ვერ ვხედავ.“-განაცხადა სერგი კაპანაძემ.