ონკოლოგიური დაავადებების მქონე ადამიანებს სახელმწიფო პრეპარატებს სრულიად დაუფინანსებს. ამის შესახებ ეკატერინე ტიკარაძემ მთავრობის სხდომის დასრულების შემდეგ ისაუბრა.

"ცვლილება ეხება იმ მნიშვნელოვან პრეპარატებს, რომელიც არის თანამედროვე მიდგომებით და ძალიან ეფექტური. დღემდე ფინანსედებოდა ამ პრეპარატების მხოლოდ გარკვეული ეტაპი და ძალიან ხშირი იყო ისეთი შემთხვევები, როდესაც ჩვენი მოქალაქეებს საბოლოო ეტაპზე ვერ ახერხებდნენ მკურნალობას. ჩვენ ვიცით, რომ დაავადების ბოლო ეტაპზე ეს არის ძალიან რთული და სწორედ აქედან გამომდინარე, მივიღეთ გადაწყვეტილება, რომ სახელმწიფო იღებს თავის პასუხისმგებლობას ჩვენი მოქალაქეები ამ რთულ პერიოდში დააფინანსოს. პრეპარატების ახალი თაობა, რომელიც არის ყველაზე ეფექტური ამ დაავადებასთან ბრძოლაში, ხელმისაწვდომი იქნება ყველა იმ მოქალაქისთვის, ვისაც ეს სჭირდება", — განაცხადა ეკატერინე ტიკარაძემ.

ამ დროისთვის სახელმწიფოს ონკოლოგიური პაციენტებისთვის ორი პროგრამა აქვს: ერთი 12 000 ლარით დაფინანსებას ითვალისწინებს, მეორე კი — 15 000 ლარით.

მინისტრის თქმით, ეს პროგრამები მკურნალობის მეთოდით განსხვავდება, თუმცა დღეს დამტკიცებული პროგრამის ფარგლებში, 8 000 ლარი ორივეს დაემატება.

"ჩვენ დავთვალეთ პოროგრამის ღირებულება და 8 000 ლარი არის ის თანხა, რომელიც საჭირო იყო პროგრამის სრული შესრულებისთვის. სწორედ აქედან გამომდინარე, პროგრამაში თითოეულ პაციენტზე ჩვენ დამატებით ანაზღაურება გამოვყავით 8 000 ლარის ოდენობით", — განაცხადა ტიკარაძემ.

დღეს საქართველოში 38 000-ზე მეტი ონკოპაციენტია და ახალი პროგრამა, რომელიც თითოეულზე დამატებით 8 000 ლარის ღირებულების პრეპარატების გამოყოფას ითვალისწინებს, 2019 წელს შექმნილი სამუშაო ჯგუფის მიერ შემუშავდა