ვანო მერაბიშვილის სასამართლო პროცესის დღევანდელი სხდომა დასრულდა. დაცვის მხარის მიერ დაყენებულ შუამდგომლობაზე, რომ 26 მაისის საქმეში, მტკიცებულებათა ნუსხაში შევიდეს ამერიკული კერძო კომპანია "დენსუსის" მომზადებული შესაბამისი დასკვნა, სასამართლოს პასუხი პროცესის განახლების შემდეგ გახდება ცნობილი.

როგორც ვანო მერაბიშვილმა დღევანდელ სასამართლო პროცესზე განაცხადა, ამ დასკვნის გარეშე სასამართლო პროცესებს აზრი ეკარგება, რადგან ესაა მტკიცებულება მისი უდანაშაულობისა და ივანიშვილისთვის კი ეს დასკვნა საბედისწეროა. "ხელისუფლება ყველაფერს აკეთებდა, რომ ეს დასკვნა არ გამხდარიყო საჯარო.

2011 წელს, 26 მაისის შემდეგ, შს სამინისტრომ მიმართა ამერიკის შეერთებული შტატების საელჩოს, რომ შესაბამისი კომპეტენტური ორგანოების მხრიდან მომხდარიყო დასკვნის მომზადება, რომ შეგვესწავლა სამინისტროს ქმედებები. ეს დოკუმენტი, ჩვენი შეთანხმებისამებრ, არ გვინდოდა გამოქვეყნებულიყო, რათა არ ჩათვლილიყო, რათა ეს იყო თავის მართლება.

ამით გარკვეულ პოპულიზმს ჰქონდა ადგილი. ეს იყო განკუთვნილი იმის დასადგენად, თუ როგორ მოქმედებდა პოლიცია. მას შემდეგ, რაც საქმე აღიძრა ჩემს მიმართ, ამ საქმეზე პროკურატურა, შს სამინისტრო, მიუხედავად ჩემი ადვოკატების არაერთი თხოვნისა, უარს ამბობდა ამ დასკვნის გასაჯაროებაზე.

მას შემდეგ, რაც მივმართეთ ამერიკის შეერთებული შტატების საელჩოს და რაც საელჩო უშუალოდ ჩაერია, დაცვის მხარეს გადაეცა ეს დასკვნა. იმ შემთხვევაში, თუ ეს დასკვნა არ ჩაიდება, ამ პროცესებს აზრი ეკარგება. ამ დასკვნის შემდეგ, ვერცერთი მოსამართლე ვერ იმსჯელებს ჩემს ბრალეულობაზე.

საქართველოს ხელისუფლებისთვის და ბიძინა ივანიშვილისთვის კი ეს დასკვნა საბედისწეროა. ამ დასკვნის ჩადება საქმეში სასიცოცხლოდ მნიშვნელოვანია", - განაცხადა ვანო მერაბიშვილმა.

როგორც პროკურატურაში განმარტავენ, ეს დასკვნა საქმეში არ უნდა ჩაიდოს, ვინაიდან დასაკითხთა შორის, დაცვის მხარეს დასკვნის ავტორები სიაში არ ჰყავს.

26 მაისის საქმეზე ივანე მერაბიშვილის სასამართლო პროცესი 27 ნოემბერის განახლდება.