"ბატონო ბიძინა, დააკვირდით მინსკის მოვლენებს!"- ანზორ ბიწაძე ივანიშვილს მიმართავს

პოლიტიკა - 16:02, 14 Aug, 2020

2342

"ბატონო ბიძინა, დააკვირდით მინსკის მოვლენებს!" - ასე მიმართავს,,ერთიანი საქართველოს“ ერთ-ერთი ლიდერი ანზორ ბიწაძე "ქართული ოცნების" თავმჯდომარეს.

მისი თქმით, ცივილიზებულ სამყაროში, არჩევნებით მანიპულირება ის წითელი ხაზია, რომლის გადაკვეთაც არავის ეპატიება.

"სულ რაღაც სამი წლის უკან, მინსკში ჩამოყალიბდა ფორმატი, რომელშიც საფრანგეთის , რუსეთის , გერმანიის და უკრაინის პრეზიდენტები იღებდნენ მონაწილეობას. ალექსანდერ ლუკაშენკო იყო მასპინძელი ფორმატისა , რომელსაც შეაიარაღებული კონფლიქტის შეწყვეტის მექანიზმები უნდა შეემუშავებინა შუაგულ ევროპაში. მიუხედავად ამისა, ანგელა მერკელმა, რომელსაც სულ რაღაც სამი წლის წინ ლუკაშენკო მასპინძლობდა, ღიად განაცხადა ბელორუსიისთვის სანქციების დაწესების შესაძლებლობის შესახებ. ცივილიზებულ სამყაროში, არჩევნებით მანიპულირება ის წითელი ხაზია, რომლის გადაკვეთაც არავის ეპატიება. წარმოიდგინეთ, როგორი იქნება ცივილიზებული სამყაროს რეაქცია, არაფორმალური მმართველის მიერ არჩევნების გაყალბების შესახებ. მეთოდები, რომლებითაც თქვენ ფონს გასვლას აპირებთ , დიდად არ განსხვავდება იმ დარღვევებისგან, რომლებიც ბელორუსიაში ვიხილეთ. თვალსაჩინოა, მანიპულირების ის ხრიკები და მეთოდები, რომლებითაც არჩევნების მოგება გინდათ. ორცხობილებივით სახელდახელოდ გამომცხვარი სატელიტებიც ფუჭად დაგრჩებათ და ის მილიარდებიც, რომლებიც თქვენს უკან დგას. საქართველოში, დემოკრატიულ ღირებულებებს, თავისუფალ არჩევენებს და ცივილიზებულ მომავალს, ალტერნატივა არ აქვს და ვერაფერი აღუდგება წინ!"- აცხადებს ბიწაძე.