"მკოიანს არ აქვს პროკურატურის იმედი, რადგან ნახა, რომ თვითონაც არ დაისაჯა"

"მკოიანს არ აქვს პროკურატურის იმედი, რადგან ნახა, რომ თვითონაც არ დაისაჯა" - ირმა ნადირაშვილი

პოლიტიკა - 16:14, 10 Aug, 2020

1300

"ევროპული საქართველოს" ერთ-ერთი ლიდერი ირმა ნადირაშვილი მიიჩნევს, რომ "ქართული ოცნების" წევრს ენზელ მკოიანს შეუძლია საკუთარ გუნდს, რომელიც პროკურატურას თავიდან ბოლომდე აკონტროლებს და პოლიტიკურ იარაღად იყენებს, მიმართოს და გამოძიება მოითხოვოს.

"თუ ასეთი შეტყობინებები განხორციელდა, ამ შეტყობინებების ავტორი აუცილებად მთელი სიმკაცრით უნდა დაისაჯოს იმიტომ, რომ მუქარა, ძალადობა, გავლენის მოხდენა მოქალაქეზე, სულ ერთია, რომელი პოლიტიკური ჯგუფის წარმომადგენელია, უნდა ისჯებოდეს კანონის მთელი სიმკაცრით, ისევე, როგორც ბატონ ემზარს უნდა ეგო პასუხი, როდესაც იარაღით ხელში ახალქალაქის ქუჩებში დარბოდა." – ამბობს ნადირაშვილი.

ნადირაშვილს მიაჩნია, ენზელ მკოიანს არ აქვს პროკურატურის და შინაგან საქმეთა სამინისტროს იმედი, რადგან ეს უწყებები არა კანონის, არამედ პოლიტიკური დაკვეთის მიხედვით მოქმედებენ. ქვეყანაში არ არის კანონის უზენაესობა და სწორედ, დეპუტატის არდასჯით წააქეზეს ძალადობა.

"ბატონ ენზელს, ალბათ, არ აქვს თავისივე პროკურატურის იმედი, იმიტომ, რომ მან ერთხელ ნახა, თვითონ როცა დარბოდა ქუჩაში, ის არ დაიჭირეს, ამიტომ დღეს ეჭვი აქვს, რომ შეიძლება ისიც არ დაიჭირონ და არ მოსთხოვონ პასუხი, ვინც მას ამ მუქარის შეტყობინებებს უგზავნის, მას არ აქვს საკუთარი გუნდის და საკუთარი პროკურატურის იმედი." – თქვა ევროპული საქართველოს წევრმა.