"უმძიმესი სიგნალი საქართველოს ხელისუფლებას... აშშ-ს მიერ ქართველი ხალხისთვის გამოყოფილ დახმარებას ხელისუფლება კითხვის ნიშნის ქვეშ აყენებს"- ბაქრაძე

პოლიტიკა - 12:52, 06 Aug, 2020

1805

აშშ-ის კონგრესის წარმომადგენელთა პალატის შესწორება აშშ თავდაცვის ავტორიზაციის აქტში, აშშ-ს მიერ საქართველოს დაფინანსებას კითხვის ნიშნის ქვეშ აყენებს - ასეთია პატრნიორი ქვეყნის დეპუტატების უპრეცენდენტო დოკუმენტზე, „ევროპული საქართველოს“ თავმჯდომარის, დავით ბაქრაძის შეფასება.

მისი თქმით, ეს არის უმძიმესი სიგნალი საქართველოს ხელისუფლებისთვის.

„ეს არის გაფრთხილება ხელისუფლებისთვის და მხარდაჭერა ოპოზიციისთვის, თითოეული იმ ადამიანისთვის, ვინც მიიჩნევს, რომ საქართველოში დემოკრატიული არჩევნები უნდა ჩატარდეს. ის ფაქტი, რომ ხელისუფლება არჩევნებამდე 3 თვით ადრე იღებს ასეთი ტიპის გაფრთხილებას, ეს რა თქმა უნდა, ცალსახად მიანიშნებს იმ უმძიმეს რეპუტაციაზე, რომელიც „ქართულ ოცნებას“ შეერთებული შტატების კონგრესში გააჩნია“, - განაცხადა ბაქრაძემ.

დავით ბაქრაძის განმარტებით, საქართველოს მოქალაქეებისთვის განკუთვნილი დახმარება „ქართული ოცნების“ და მათი ლიდერების პრორუსული პოლიტიკის მძევალი არასდროს აღარ უნდა გახდეს.

„ეს ბოლო ერთი თვის განმავლობაში უკვე მეორე შემთხვევაა, როდესაც ქართველი ხალხისთვის განკუთვნილი დახმარება ეჭვის ქვეშ დგება საქართველოს ხელისუფლების მოქმედებების გამო. რაც განსაკუთრებით მნიშვნელოვანია, ეს არ არის ცალკეული კონგრესმენების განცხადება, კომენტარი ან თუნდაც წერილი, ეს არის დოკუმენტი, რომელსაც აქვს სავალდებულო ძალა და მიღებულია მთლიანად წარმომადგენლობითი პალატის კენჭისყრით. ეს არის კონგრესის ოფიციალური დოკუმენტი. უკვე მეორე შემთხვევაა, როდესაც ქართველი ხალხისთვის განკუთვნილ დახმარებას კითხვის ნიშნის ქვეშ აყენებს საქართველოს ხელისუფლება და „ქართული ოცნების“ მოქმედება. ეს არის კიდევ ერთი მიზეზი, რატომ უნდა ვუთხრათ „არა“ ამ ხელისუფლებას ოქტომბრის არჩევნებზე - იმიტომ, რომ ქართველებისთვის, საქართველოს მოქალაქეებისთვის განკუთვნილი დახმარება არასდროს აღარ გახდეს „ოცნების“ და მათი ლიდერების პრორუსული პოლიტიკის მძევალი. ქართულ-ამერიკული ურთიერთობების განვითარება უნდა გაგრძელდეს ყოველგვარი კითხვის ნიშნების, პირობითობებისა და შეფასების გარეშე“, - განაცხადა ბაქრაძემ.