წინა ხელისუფლების დროს დაპროექტებულ და აგებულ ქუთაისის აეროპორტში ხვალ სამეთვალყურეო კოშკი ოფიციალურად გაიხსნება.

მისი მშენებლობა 2012 წლის მარტში დაიწყო. როგორც საქაერონავიგაციიდან იტყობინებიან, მოძრაობის მართვა ქუთაისის საერთაშორისო აეროპორტის ტერიტორიაზე დღემდე საქაერონავიგაციის კუთვნილი მობილური სამეთვალყურეო კოშკიდან ხორციელდებოდა, 19 ნოემბრიდან კი თვითმფრინავების უსაფრთხო გადაადგილების უზრუნველყოფა თანამედროვე, საერთაშორისო სტანდარტებთან შესაბამისი ტექნოლოგიებით აღჭურვილი ახალი ტაუერიდან მოხდება.

ავიამეთვალყურეები ახლა უფრო კომფორტული გარემოდან შეძლებენ საჰაერო მიმოსვლის მართვას. ქუთაისის სამეთვალყურეო კოშკის გახსნა უმნიშვნელოვანესი ფაქტია საქართველოს საავიაციო ინდუსტრიის განვითარებისთვის, რადგან კიდევ უფრო მეტად გაიზრდება ფრენების უსაფრთხოების დონე საქართველოში და კიდევ უფრო მიმზიდველი გახდება ჩვენი ქვეყნის საჰაერო სივრცე მსოფლიოს სხვადასხვა ავიაკომპანიებისთვის.

ქუთაისის თაუერი თავისი სიმაღლითა და ორიგინალური დიზაინით აღმოსავლეთ ევროპის გამორჩეულ სამეთვალყურეო კოშკურების ხუთეულშია. ქუთაისის სამეთვალყურეო კოშკისა და ადმინისტრაციული შენობის არქიტექტურული პროექტი ჰოლანდიურ კომპანია UNStudio-ს ეკუთვნის, მათ მშენებლობასა და მოპირკეთებაზე კი რამდენიმე ქართული სამშენებლო კომპანია მუშაობდა.

შეგახსენებთ, რომ წინა ხელისუფლების დროს ცალ-ცალკე გაიხსნა ქუთაისის აეროპორტის ასაფრენი ზოლი, ტერმინალი და ადმინისტრაციული შენობა. ხვალიდან აეროპორტში ცალკე გახსნილი ობიექტების ნუსხას, უკვე ახალი ხელისუფლება სამეთვალყურეო კოშკით დაასრულებს.