თამარ ბაჩალიაშვილის საქმის გამოძიება და აშშ-ის გამოძიების ფედერალური ბიუროს (FBI) ჩართულობა - გარდაცვლილის მშობლებსა და ადვოკატს შს მინისტრის მოადგილე ვლადიმერ ბოცვაძე და მამუკა ჭელიძე შეხვდნენ.

მიხეილ რამიშვილის თქმით, მათ მოწმეთა ჩვენებების ნაწილი გააცნეს.

“გავეცანით გარკვეული პირების ჩვენებებს, რამაც კიდევ უფრო მეტი კითხვის ნიშნები გააჩინა და ვერსიებმა იმატა. გამოძიების ინტერესებიდან გამომდინარე კონკრეტულად ვერ ვილაპარაკებ. ჯერ არ არის სატელეფონო ზარები მოსული, თუმცა მზადაა დრონის მასალა, რომელიც დიდი მოცულობისაა, გადმოწერას და დიდ ეკრანზე გაცნობას საჭიროებს"- ამბობს რამიშვილი.

მიხეილ რამიშვილის თქმით, საგამოძიები უწყებების მხრიდან საქმეში FBI-ის ჩართულობასთან დაკავშირებით ოფიციალური მოთხოვნა გაგზავნილია, თუმცა ოჯახი უნდა დარწმუნდეს, რომ ეს პროცესი ფორმალური არ იქნება.

“უნდა ვიცოდეთ, რა იქნება ფედერალური ბიუროს ჩართულობის არეალი. ჩვენი მოთხოვნაა, მაქსიმალური ჩართულობა, მათ შორის ექსპერტიზაში და ყველა შესაძლებლობის გამოყენება. ეს არ უნდა იყოს მოჩვენებითი პროცესი”, – განაცხადა რამიშვილმა.