17 ნოემბერს, საერთაშორისო არასამთავრობო ორგანიზაცია ქართველ სტუდენტთა მსოფლიო გაერთიანების (wugs) ორგანიზებით, ქართველმა სტუდენტებმა ბრიუსელში, რუსეთის საელჩოსთან ოკუპაციის წინააღმდეგ აქცია გამართეს. უცხოელ მეგობრებთან ერთად ქართველმა სტუდენტებმა ოკუპაციის წინააღმდეგ პროტესტი ლონდონში, რიგაში, მიუნხენსა და პრაღაშიც დააფიქსირეს.

აქციის მონაწილეებს ხელში თეთრი მტრედი ეჭირათ, როგორც თავისუფალი საქართველოს და მშვიდობიანი ურთიერთობების სიმბოლო.

„აუცილებელია, დავანახოთ რუსეთის მთავრობას, რომ ქართველი ახალგაზრდობა ვერ შეეგუება ხელოვნურად წარმოქმნილ დაძაბულობას და მტრობას იმ ხალხთან, რომელთანაც ზოგს ოჯახი, ზოგს ნათესავები, ზოგს კი მეგობრობა აკავშირებს. ურთიერთობა აუცილებლად უნდა გამოსწორდეს. ამ პროცესის დაწყება ხელეწიფება მხოლოდ რუსეთის სახელმწიფოს და ამიტომ, 17 ნოემბერს სტუდენტების საერთაშორისო დღეს, ევროპაში მცხოვრები ქართველი სტუდენტები ერთად ვაპროტესტებდით რუსეთის აგრესიას. შევეცადეთ რუსეთის სახელმწიფოსთვის დაგვენახებინა, რომ ჩვენ, ჩვენი ქვეყნის მომავალმა თაობებმა ვიცით როგორ ვიცხოვროთ და ვაშენოთ ჩვენი ქვეყნის მომავალი“,- განაცხადა აქციის ორგანიზატორმა ნინო შარაშიძემ.