საქართველოში საბერძნეთის ელჩი, დიმიტრი კარაბალისი აცხადებს, რომ საქართველოს გადაწყვეტილებას, რომლის მიხედვითაც მათ საბერძნეთს საზღვარი არ გაუხსნეს, ახსნას ვერ უძებნის.

"ეს გადაწყვეტილება არ გვესმის, ახსნას ვერ ვპოულობთ და ვერც ქართული მხარიდან

მოვისმინეთ განმარტება. იმ მონაცემებზე დაყრდნობით, რომელიც გვაქვს, გეტყვით, რომ საქართველოდან საბერძნეთში გაფრენის მსურველი გაცილებით მეტია, ვიდრე პირიქით.

საბერძნეთმა, "შავ სიაში" შემავალ სხვა სახელმწიფოებთან ერთად, ბრიუსელში ბევრი იბრძოლა იმისთვის, რომ საქართველო უსაფრთხო ქვეყნების სიაში შეეყვანათ, თუმცა თავდაპირველად ასეთი მოცემულობა არც კი იყო.

საბოლოოდ ევროკავშირმა საქართველოს საკუთარი საზღვრები გაუხსნა. იმავე დღეს ხელისუფლებას ვაცნობეთ, რომ შეგვეძლო, საქართველოს მოქალაქეები საბერძნეთში უპირობოდ მიგვეღო, მათგან შესაბამის პასუხს ველოდით, რაც ვერ მივიღეთ" - აცხადებს საბერძნეთის ელჩი.