ეს არის ნამდვილად ტრაგედია მშობლებისთვის, საზოგადოებისთვის და ბუნებრივია, ოჯახის ერთადერთი მოლოდინი არის ამომწურავი გამოძიება - ამის შესახებ პარლამენტის თავმჯდომარემ, არჩილ გამზარდიამ ჟურნალისტებთან საუბრისას განაცხადა.

არჩილ თალაკვაძის თქმით, ტრაგედიების პოლიტიკური მიზნით გამოყენება ხდება.

"ეს არის ნამდვილად ტრაგედია მშობლებისთვის, საზოგადოებისთვის და ბუნებრივია, ოჯახის ერთადერთი მოლოდინი არის ამომწურავი გამოძიება და მართლმსაჯულების სამართლიანად განხორციელება. სამართალდამცავებს აქვთ ჩვენი სრული მხარდაჭერა, რომ ამომწურავად გამოიძიონ ეს საქმეები და მისცენ პასუხისგებაში დამნაშავეები. თუ ჩვენ გვსურს, მართლწესრიგი და გვსურს დანაშაულის დონე შევამციროთ ქვეყანაში, ვებრძოლოთ მომავალშიც ასეთი ტიპის დანაშაულებს, ამისთვის მნიშვნელოვანია, რომ ამ ორივე შემთხვევაშიც მართლმსაჯულება ბოლომდე და ეფექტურად განხორციელდეს. სამართალდამცავებს აქვთ სრული მხარდაჭერა ამაში და შემდგომ უკვე ჩვენ დაველოდებით ქართული სასამართლოს გადაწყვეტილებებს თითოეულ საქმესთან დაკავშირებით.

მეორე მხრივ რა თქმა უნდა, ამორალურია ამ ტრაგედიების გამოყენება პოლიტიკური მიზნებისთვის. ეს საქმეები უნდა გამოიძიონ არა პოლიტიკურმა პარტიებმა, არამედ სამართალდამცავმა სტრუქტურებმა. საზოგადოების და ოჯახების ინტერესი ორივე საქმეზე არის ლეგიტიმური და ჩვენ, როგორც ხელისუფლება რა თქმა უნდა, ამ პასუხისმგებლობას ვაცნობიერებთ, რომ საზოგადოებას ვუთხრათ ის, რაც ფაქტებით იქნება დადგენილი. მესმის, რომ მედიას სურს უფრო სწრაფად თქვას ვერსიები, უფრო სწრაფად წარმოადგინოს საკუთარი მოსაზრებები და არგუმენტები, თუმცა, უნდა გვესმოდეს, რომ გამოძიებას სჭირდება მტკიცებულებები, ექსპერტიზის დასკვნები, ვერსიების გადამოწმება, მოწმეთა გამოკითხვები და ამას ხშირ შემთხვევაში, უფრო მეტი დრო სჭირდება, ვიდრე მედიის მხრიდან ვერსიების დასახელებას", - განაცხადა თალაკვაძემ.