ერგნეთში ინციდენტების პრევენციისა და მათზე რეაგირების მექანიზმის ფორმატში მორიგი, 96-ე შეხვედრა გაიმართა. მონაწილე მხარეები ერთმანეთს 11-თვიანი პაუზის შემდეგ შეხვდენენ.

შეხვედრა 6 საათს გაგრძელდა, თუმცა კონკრეტული შედეგის გარეშე დასრულდა.

სახელმწიფო უსაფრთხოების სამსახურის ანალიტიკური დეპარტამენტის ხელმძღვანელის მოადგილის, ირაკლი ანთაძის განცხადებით, საუბრის მთავარუ საკითხი ხვიჩა მღებრიშვილისა და გენადი ბესტაევის უპირობოდ გათავისუფლება და ჩორჩანას ირგვლივ განვითარებული დესტრუქციული პროცესები იყო.

"პირველივე დღიდან ჩვენ მოვითხოვეთ უკანონოდ დაკავებულები ზაზა გახელაძის უპირობო გათავისუფლება. აღნიშნული ითქვა ამ შეხვედრაზეც, ასევე ვისაუბრეთ პატიმრობაში მყოფი ხვიჩა მღებრიშვილისა და გენადი ბესტაევის უპირობოდ გათავისუფლებისა და საკუთარ ოჯახებში რაც შეიძლება მალე დაბრუნების აუცილებლობაზე. ვიმსჯელეთ ე.წ. ბორდერიზაციის პროცესზე, საქართველოს მოქალაქეების უკანონოდ დაკავებისა და სხვა ფაქტებზე, რასაც ადგილი ჰქონდა საანგარიშო პერიოდში. ვისაუბრეთ თავისუფალი გადაადგილების კუთხით არსებულ შეზღუდვაზე. საუბარი შეეხო ჩვენი თანამოქალაქეების მკვლელობის ფაქტებსაც, რომელიც გახლავთ ჩვენი დღის წესრიგის მუდმივი შემადგენელი ნაწილი.

ჩორჩანას ირგვლივ განვითარებული დესტრუქციული პროცესები იყო განხილვის საგანი და დღის წესრიგის ერთ-ერთი მთავარი საკითხი. ჩვენ გვქონდა საკმაოდ ვრცელი ინტერვენცია მათ მიერ კონტროლირებადი მედია აუთლეტების მეშვეობით გავრცელებულ დეზინფორმაციულ კამპანიაზე, აქ ფიგურირებდა ღამურების თემაც. მღებრიშვილზე დაისვა კონკრეტული კითხვა რა ფორმულირებით აქვს წარდგენილი ე.წ. ბრალი. მიღებული პასუხის მიხედვით, მას ე.წ. ბრალი ედება საზღვრის კვეთაში. რაც შეეხება ღამურების ეპიზოდს, ვერ მივიღეთ დადასტურება, რომ მღებრიშვილის მხრიდან ადგილი ჰქონდა ადგილობრივი ფაუნის ხელყოფის მცდელობას," - განაცხადა ირაკლი ანთაძემ.