"წერილის შემოქმედია ადამიანი, რომელსაც ფულს უხდიან"

"წერილის შემოქმედია ადამიანი, რომელსაც ფულს უხდიან" - კახა კუჭავა კონგრესმენზე

პოლიტიკა - 20:00, 30 Jul, 2020

1206

პარლამენტის თავმჯდომარის მოადგილე, კახა კუჭავა კონგრესმენების წერილს, სადაც ივანიშვილი რუს ოლიგარქადაა მოხსენიებული, ეხმაურება და აცხადებს, რომ წერილის ხელმომწერს ფულს უხდიან.
კუჭავამ ასევე პრემიერ-მინისტრისა და მაიკ პომპეოს სატელეფონო საუბარზეც ისაუბრა და განაცხადა, რომ წერილი დაიწერა მანამ, სანამ სახელმწიფო მდივან მაიკ პომპეოსა და პრემიერის სატელეფონო საუბარი შედგებოდა.
"წერილის მთავარი შემოქმედი არის ადამიანი, რომელიც ცნობილია, როგორც ლობისტური საქმიანობით დაკავებული ფრონტერას მხრიდან და მას ოფიციალურად ფულს უხდიან" - განაცხადა კუჭავამ რუსთავი 2-ის ეთერში.

„მადლობას გიხდით თქვენი წინამძღოლობისა და ურყევი სახელმწიფოებრივი სამსახურისთვის ჩვენი ქვეყნის წინაშე. კიდევ ერთხელ გწერთ, რათა გამოვხატოთ ჩვენი შეშფოთება საქართველოში დემოკრატიული მმართველობის შემცირებისა და კორუფციის ფაქტების გამო.
როგორც იცით, მას შემდეგ რაც საქართველომ 1991 წელს მოიპოვა დამოუკიდებლობა , ქვეყანამ დიდი ნაბიჯი გადადგა ეკონომიკის განვითარებისა და გეოპოლიტიკური უსაფრთხოების მიმართულებით, რათა უზრუნველეყო უდიდესი ხელმისაწვდომობა საერთაშორისო სავაჭრო პარტნიორებთან, გაეღრმავებინა თავდაცვითი ურთიერთობები და ჩამოეყალიბებინა თავისუფალი, სამართიანი საარჩევნო გარემო, თუმცა მას შემდეგ, რაც რუსი ოლიგარქი, ბიძინა ივანიშვილი და მისმა პარტია ქართული ოცნება მოვიდა ხელისუფლებაში 2012 წელს, ქვეყანა უკან იხევს.
სახელმწიფო დეპარტამენტი ყველაფერს აკეთებს, რათა მოახდინოს კერძო სექტორში სიტუაციის გაუარესების მონიტორინგი, განსაკუთრებით კი ყურადღება გამახვილებულია ამერიკულ კომპანიებზე, აგრეთვე უნდა მოხდეს მონიტორინგი საქართველოს მთავრობის ვალდებულებებზე დემოკრატიული რეფორმების გატარების კუთხით, რათა ქვეყანა გახდეს ნატოს წევრი." - ნათქვამია კონგრესმენების მიერ გამოქვეყნებულ წერილში.