ამოქმედება არ ატარებს სავალდებულო ხასიათს - როგორ კითხულობს ზალკალიანის უწყება აშშ-ს წარმომადგენელთა პალატის აქტს

პოლიტიკა - 16:43, 25 Jul, 2020

1708

საქართველოს საგარეო საქმეთა სამინისტრო საქართველოსთვის აშშ-ს დახმარების შესაძლო შემცირების შესახებ განცხადებას ავრცელებს.

ზალკალიანის უწყების მტკიცებით, დახმარების შემცირების თაობაზე ჩანაწერი "არ ატარებს სავალდებულო ხასიათს":

"აშშ-ის სახელმწიფო, საგარეო ოპერაციებისა და მასთან დაკავშირებული პროგრამების კანონპროექტი კვლავ ითვალისწინებს საქართველოსთვის სოლიდურ ფინანსურ დახმარებას და $132 მილიონს აღწევს. კანონპროექტის თანახმად, თანხის 15%-ის გადაცემა სავალდებულო არ არის, სანამ სახელმწიფო მდივანი არ დაადგენს და კომიტეტებს არ წარუდგენს ანგარიშს იმის თაობაზე, რომ საქართველოს მთავრობა ეფექტურ ნაბიჯებს დგამს დემოკრატიული ინსტიტუტების გაძლიერების, კორუფციასთან ბრძოლის, კერძო სექტორში კანონის უზენაესობისა და საერთაშორისოდ აღიარებული სტანდარტების დაცვის კუთხით. აღნიშნული ჩანაწერი კონგრესის საზედამხედველო ფუნქციით არის ნაკარნახევი და მისი ამოქმედება არ ატარებს სავალდებულო ხასიათს." - ნათქვამია სამინისტროს განცხადებაში.

მათივე თქმით, "იმ საკითხებში, რომლის თაობაზე კონგრესი სახელმწიფო დეპარტამენტის ანგარიშს ითხოვს, საქართველო პროგრესირებს, რაც აღიარებულია თავად საერთაშორისო საზოგადოებისა და ჩვენი მთავარი სტრატეგიული პარტნიორის მიერ".

ზალკალიანის უწყების მტკიცებით, კანონპროექტის ტექსტი საბოლოოდ ჯერ არ დამტკიცებულა - ჯერ წინაა სენატის თანხმობა, კონგრესის ორივე პალატაში საბოლოო შეჯერება და პრეზიდენტის ხელმოწერა.

კონგრესის წარმომადგენელთა პალატამ საქართველოს დახმარების 15%-ის შეჩერების აქტი დაამტკიცა.