მამა პეტრე კოლხი აია სოფიას ტაძარში პარასკევს მუსლიმური მსახურების შესრულების ფაქტს სოციალური ქსელის მეშვეობით ეხმაურება. სასულიერო პირის განცხადებით, აია სოფია მუდამ იქნება ბიზანტიის იმპერიისა და ქრისტიანობის საუკუნოვანი ტრადიციის სინთეზი:

„აია სოფია მსოფლიოს თვალში მუდამ დარჩება ბიზანტიის იმპერიის და ქრისტიანობის საუკუნოვანი ტრადიციის სინთეზად.

მოზაიკით აწყობილი ღვთისმშობლის მზერა, არასდროს შეისმენს მოლას გაუგებარ ლოცვას. საუკუნეებიდან გადმოსული ფრესკები ვერ დაიფარება თეთრი ზეწრებით, რომელშიც უფრო გამოკვეთილად აისახა ოტომანთა მემკვიდრეების შავბნელი ზრახვები…

ახლა იწყება შემთხვევით გაძლიერებული სახელმწიფოს რეგრესი და ამის მიზეზი იუსტინიანეს დროს აგებული ტაძრის მითვისებაა…

დაინგრა ტროა, განადგურდა სემირამიდას ბაღები, დაიმხო ბაბილონის გოდოლის იდეა…

დღევანდელი სიბნელე არაფრით შერჩება ქრისტეს ეკლესიის დამტყვევებელს!..“, – წერს მოძღვარი.

აია–სოფიას ტაძარში გუშინ, 24 ივლისს მსახურება აღევლინა.

თურქეთის რელიგიის საკითხთა სამმართველოს მეთაურმა, ალი ერბაშმა სტამბოლში, მეჩეთად გადაკეთებულ ტაძარში მსახურებისთვის სამი იმამი და ხუთი მუეძინი დანიშნა.

10 ივლისს ქვეყნის პრეზიდენტმა, რეჯეფ თაიფ ერდოღანმა ხელი მოაწერა ბრძანებას, რომლის მიხედვითაც, სტამბოლში მდებარე აია-სოფიას ტაძარს ოფიციალურად მიანიჭა მეჩეთის სტატუსი.