გახარიას მორიგი დაპირება: "შაქარაშვილის და ბაჩალიაშვილის საქმე ბოლომდე იქნება გამოძიებული"

პოლიტიკა - 12:07, 24 Jul, 2020

1933

შაქარაშვილის და ბაჩალიაშვილის საქმეები - საკითხზე დღეს საქართველოს პრემიერ-მინისტრმა მედიასთან ისაუბრა და პირობა დადო, რომ რეზონანსული საქმეები გამოძიებული იქნება.

„შაქარაშვილის და ბაჩალიაშვილის საქმე ბოლომდე იქნება გამოძიებული. შინაგან საქმეთა მინისტრის ამოცანაა გამოძიების ბოლომდე მიყვანა და დასრულება. დარწმუნებული ვარ, რომ ორივე საქმე ბოლომდე იქნება გამოძიებული“, - თქვა მთავრობის მეთაურმა.

პრემიერმა გუშინ გაკეთებულ საკუთარი განცხადებაც განმარტა, რომლის მიხედვითაც გამოძიებას პრობლემები აქვს. გახარიას თქმით, მართლმსაჯულების სისტემას გარკვეული რეფორმირება სჭირდება, სწორედ ამიტომ მომზადებულია საკანონმდებლო ცვლილებები, რომელიც განხორციელდება.

„გამოძიებასთან დაკავშირებით მე ვთქვი ზუსტად ის, რასაც ვამბობდი მაშინ, როდესაც შსს მინისტრი ვიყავი. ჩვენს მართლმსაჯულების სისტემას გარკვეული რეფორმირება სჭირდება. ამას ვაკეთებდი შს სამინისტროში. სისტემური განახლება რაც იყო, იყო სწორედ ის რეფორმების მიმართულება, რომელიც უნდა გაგრძელდეს.

გამოძიების ფუნქციის გამიჯვნა არის აუცილებელი იმისთვის, რომ გამოძიების ხარისხი გაძლიერდეს. კიდევ ბევრი რამ არის გასაკეთებელი მართლმსაჯულების სისტემაში, საკანონმდებლო ცვლილებები მომზადებულია და ეს ყველაფერი განხორციელდება.

სხვა რამე ვთქვი და ინტერპრეტაციები არ უნდა შევცვალოთ. მე ვთქვი ის, რომ კომუნიკაცია, მაშინ, როდესაც მძაფრ პოლიტიკურ პროცესში ვართ და სამწუხაროდ ისევე, როგორც სტრატეგიულ პარტნიორთან ურთიერთობას ზოგიერთი ძალა იყენებს ქვეყნის საწინააღმდეგოდ, ამ შემთხვევაში კონკრეტული ოჯახების ტრაგედია იყენებენ პოლიტიკური პროცესისთვის და ეს ინტერპრეტირების საშუალება რომ არ მივცეთ, ასეთი სივრცეები არ უნდა დარჩეს ინტერპრეტირებისთვის“, - აცხადებს პრემიერი.