"ქვეყანაში ფუნდამენტური პოლიტიკური ცვლილებების დროა" - სალომე სამადაშვილი Edison Research-ის კვლევაზე

პოლიტიკა - 15:11, 17 Jul, 2020

948

„ერთიანი ნაციონალური მოძრაობის“ ერთ-ერთი ლიდერი სალომე სამადაშვილი მიიჩნევს, რომ გუშინ გამოქვეყნებული პოლიტიკური კვლევებისგან სრულიად განსხვავებული სურათი შეიძლება აჩვენოს არჩევნებმა და ამის მიზეზებს განმარტავს. „კვლევა აჩვენებს, რომ შემდეგი მთავრობა, რომელიც ბიძინა ივანიშვილის ოლიგარქიულ რეჟიმს შეცვლის, კოალიციაური იქნება და სხვადსხვა პარტიებისგან შემდგარი.თუმცა, აქ მთავარი მოთამაშე, ასევე კვლევების მიხედვით ერთიანი ნაციონალური მოძრაობა იქნება, როგორც ყველაზე დიდი პოლიტიკური პარტია.
აღსანიშნავია, რომ ეს კვლევა ჩატარებულია პანდემიის პიკის დროს. ფაქტობრივად, საქართველოში, ისევე როგორც ბევრ სხვა ქვეყანაში, პანდემიის დროს სახელისუფლებო პარტიების მიმართ მხარდაჭერა იზრდება. ამიტომ, ჩვენ ვფიქრობთ, რომ რეალურად არჩევნებისთვი სრულიად სხვა სურათი გვექნება. განსაკუთრებით იმ ფონზე, როცა ჩვენი ხალხისთვის, მთავარი პრობლემა არის ეკონომიკა, უმუშევრობა და ფასების ზრდა. ამ მიმართულებით კი ხელისუფლებას არაფერი აქვს გაკეთებული და ქვეყანაში ვითარება დღითიდღე მძიმდება.
გარდა ამისა, იგივე კვლევები აჩვენებს, რომ ამომრჩევლის დიდ უმრავლესობას ახალი ხელისუფლება, ახალი მთავრობა სურს. ეს კვლევა აჩვენებს, რომ ქვეყანაში ფუნდამენტური პოლიტიკური ცვლილებების დროა"- აცხადებს სამადაშვილი.

Edison Research-ის კვლევის თანახმად, კითხვაზე არჩევნები რომ დღეს ტარდებოდეს შედეგები ასე გადანაწილდა: ოცნება - 39%, ენმ - 16%, ევროპელები - 5% გადაუწყვეტელი ამომრჩევლის მაჩვენებელია -20%.