2016-2020 წლებში შსს-მ რეკლამაში 747 000 დახარჯა - თუმცა კონკრეტულ დეტალებს მალავს

პოლიტიკა - 15:11, 16 Jul, 2020

1637

"ფლანგვის დეტექტორის" ინფორმაციით, 2018 წელს სარეკლამო ხარჯებში შსს-მ 394,207 ლარი დახარჯა, რაც 21-ჯერ აღემატება 2017-ის მონაცემებს;

ორგანიზაციის ინფორმაციით, ოფიციალური მოთხოვნის მიუხედავად შს სამინისტრო საჯარო ინფორმაციას მალავს და უცნობია, კონკრეტულად რაში იხარჯება თანხა;

როგორც ირკვევა, მხოლოდ 2018-2019 წლებში “რეკლამაზე” დახარჯული თანხა 21 გამომძიებლის 2 წლის ხელფასს უდრის;

"2016-2020 წლებში შინაგან საქმეთა სამინისტრომ 747,522 ლარი დახარჯა სარეკლამო მომსახურებაში, თუმცა უცნობია ინფორმაცია იმ ხელშეკრულებების შესახებ, რომელიც სარეკლამო მომსახურების მიზნით გააფორმა.

ყველაზე დიდი რაოდენობის თანხები შინაგან საქმეთა სამინისტრომ 2018-2019 წლებში დახარჯა. 2018 წელს - 394,207 ლარი, ხოლო 2019 წელს 234,404 ლარი. აღსანიშნავია, რომ 2018 წელს სამინისტროს სარეკლამო ხარჯები წინა წელთან შედარებით 21-ჯერ გაიზარდა. თუმცა უცნობია, რით არის განპირობებული თანხების ამგვარი მკვეთრი ზრდა.

2020 წელი (I კვარტალი)- 1,066 ლარი
2019 წელი - 234,404 ლარი
2018 წელი- 394,207 ლარი
2017წელი - 18,710 ლარი
2016 წელი- 99,133 ლარი

ფლანგვის დეტექტორმა შინაგან საქმეთა სამინისტროსაგან სარეკლამო ხარჯების შესახებ დეტალური ინფორმაცია გამოითხოვა, თუმცა სამინისტრომ დეტალური ინფორმაციის მოწოდებაზე უარი განაცხადა და საინტზე განთავსებულ ინფორმაციაზე მიგვითითა, სადაც მხოლოდ რეკლამირებაში დახარჯული საერთო თანხებია განთავსებული. სამინისტროს სარეკლამო ხარჯების შესახებ ინფორმაციის მოძიება ვერც სამინისტროს მიერ განხორციელებული ტენდერების მეშვეობით შევძელით, რადგან წლის მანძილზე განხორციელებული შესყიდვების ჩამონათვალში სარეკლამო მომსახურების შესყიდვის შესახებ ინფორმაცია არ არის.

საინტერესოა, ზუსტად ვისგან შეისყიდა შსს-მ აღნიშნული მომსახურება, კონკრეტულად როდის შეისყიდა, რა შინაარსის იყო რეკლამები, რომლებსაც სამინისტრო უკვეთავდა, ასევე სად იყო და არის განთავსებული აღნიშნული რეკლამები.

წყარო:

შსს https://mod.gov.ge/ge/public
წერილი - https://bit.ly/3eqFT8h
პასუხი - https://bit.ly/2Zw8tkk
შრომის ანაზღაურება https://police.ge/files/sajaro_informacia/Xelfasi.pdf"- წერია განცხადებაში.