"ევროპული საქართველო"ს წევრი, გიორგი კანდელაკი საქართველოს მთავრობას მიმართავს გაივლის თუ არა 2-კვირიან სავალდებულო კარანტინს დავით ზალკალიანი მას შემდეგ, რაც ბელგიიდან საქართველოში დაბრუნდება.

კანდელაკმა აღნიშნა, რომ ბელგია საქართველოს მთავრობას ე.წ მწვანე ქვეყნების სიაში არ შეუყვანია, ხოლო საქართველოს იმ მოქალაქეებისთვის, რომლებიც ე.წ მწვანე ქვეყნებიდან ჩამოდიან, 2-კვირიანი კარანტინის გავლა სავალდებულოა.

"თუ არ გაივლის ბატონი ზალკალიანი კარანტინს, მთავრობამ უნდა გააკეთოს განმარტება, რატომ. რატომ არის გამონაკლისი ბატონი ზალკალიანი სხვა კეთილსინდისიერ მოქალაქეებთან შედარებით, მით უმეტეს, რომ ის იმყოფებოდა გაუმწვანებელ ქვეყანაში". - თქვა კანდელაკმა.

დეპუტატი ირწმუნება, რომ ხელისუფლება არა ეპიდემიოლოგიური, არამედ პოლიტიკური მიზნებით ხელმძღვანელობს და ამას ის არგუმენტები ამყარებს, რომ ფაქტობრივად, ფრენები აღდგენილი არ არის, კომპანია Wizz Air-ს არჩევნებამდე (31 ოქტომბრამდე) უარს ეუბნება ფრენების დაწყებაზე, ამასთან, Air Baltic-ს, მატთვის სასურველი კვირაში 3 ფრენის ნაცვლად, მხოლოდ ერთ ფრენაზე აძლევს ნებართვას.

"გუშინ განცხადება მეც გავაკეთე და გიდებსაც ჰქონდათ საპროტესტო აქცია, გაკეთდა განცხადება მთავრობის მავნებლობებზე. ეს განცხადებები, ზრდილობის გამოც კი, არავის უარუყვია. ჩვენ შეგვიძლია, შევაჯამოთ ეს ყველაფერი, მივიღოთ მთავრობის დუმილი დასტურად, რომ ეს ყველაფერი არის სიმართლე და ჩვენ ხელში შეგვრჩება ფორმალური გახსნის ფონზე ძალიან ცოტა, ძალიან ძვირი ფრენები და დე ფაქტო, საქართველო დარჩება ჩაკეტილი არჩევნებამდე.

ტურიზმის სფეროში შემოსავლები შემცირებულია 97%. ამ გაჯიუტებით და გაჯიქებით მთავრობა ათეულობით ათას ადამიანს ეუბნება, რომ ისინი განწირულები არიან შიმშილისთვის". - თქვა კანდელაკმა.