მდინარე ჯუმში 15 წლის მოზარდის ცხედარი იპოვეს

შემთხვევა - 10:39, 15 Jul, 2020

2314

მდინარე ჯუმში 15 წლის მოზარდის ცხედარი იპოვეს. სპეციალისტებმა ბავშვის ცხედარი მდინარე ჯუმისა და ენგურის შესასვლელთან დღეს დილით ნახეს.

მოზარდი წყალმა 13 ივლისს საღამოს წაიღო, როცა ის ადიდებულ მდინარეში, საქონლის გადმოსარეკად ჩავიდა.

ინფორმაციას სამაშველო სამსახური ავრცელებს.

"ორდღიანი უწყვეტი საძიებო სამუშაოების შედეგად, ზუგდიდში, სოფელ დარჩელში დაკარგული არასრულწლოვნის ცხედარი მაშველებმა მდინარე ჯუმში, გაუჩინარების ადგილიდან 3 კმ-ში იპოვეს.

საძიებო სამუშაოებში ჩართული იყვნენ სახანძრო-სამაშველო ჯგუფები სამეგრელო-ზემო სვანეთის, იმერეთის და აჭარის რეგიონებიდან. ოპერაციაში, ასევე, მონაწილეობდა განსაკუთრებულ საგანგებო სიტუაციებზე რეაგირების მთავარი სამმართველოს ჯგუფი თბილისიდან.

მობილიზებული იყო დრონი და სამი ერთეული მცურავი საშუალება. წყლის ფსკერის დათვალიერება მიმდინარეობდა ექოლოტის საშუალებით. ადგილზე შექმნილი იყო სამუშაო შტაბი, საიდანაც ხორციელდებოდა ოპერაციის მონიტორინგი.

დაკარგული არასრულწლოვნის შესახებ შინაგან საქმეთა სამინისტროს საზოგადოებრივი უსაფრთხოების მართვის ცენტრ "112"-ში შეტყობინება 13 ივლისს შემოვიდა, რის შემდეგაც საგანგებო სიტუაციების მართვის სამსახურმა მდინარე ჯუმში აქტიური საძიებო-სამაშველო ოპერაცია დაიწყო", - ნათქვამია ინფორმაციაში.