ბიძინა ივანიშვილი, "ოცნების" მაშველი რგოლი - ოლიგარქი ხმებზე ნადირობას იწყებს

პოლიტიკა - 17:40, 14 Jul, 2020

2371

ბიძინა ივანიშვილი პოლიტიკური კულისებიდან გამოდის და პოლიტიკაში ბრუნდება - "ოცნების" დეპუტატები არ უარყოფენ, რომ საარჩევნო კამპანიისას პარტიული ხმების მობილიზებაში ივანიშვილის ფაქტორი მთავარი იქნება.

ჯერჯერობით კვლავ უცნობია რა ფორმით ჩაერთვება ოლიგარქი არჩევნებში, თუმცა "ქართული ოცნების" დეპუტატები აცხადებენ, რომ საარჩევნო სიის შედგენაში პარტიის თავმჯდომარე აქტიურადაა ჩართული.

"ბიძინა ივანიშვილი არის პარტიის ხელმძღვანელი, მმართველი პარტიის, რომელიც ყველა მონაცემის თანახმად იმარჩვებს საპარლამენტო არჩევნებში , ეს ადამიანი ბუნებრივია ჩართულია, ყოველდღიურ კონსულტაციებს გავდივართ, მათ შორის მაჟორიტარებთან დაკავშირებით, მათ შორის პარტიულ ღონისძიებებთან დაკავშირებით, იგი ყოველდღიურ ურთიერთობაშია ჩვენთან და დილიდან საღამომდე დაუღალავად შრომობს. რაც შეეხება მის საარჩევნო აქტიურობას ეს მასზეა დამოკიდებული" - ამბობს "ქართული ოცნების" დეპუტატი მდინარაძე.

"ოცნებში" ამბობენ, რომ ოპოზიციას ივანიშვილის აქტიურობის ეშინიათ. რატი იონათამიშვილის თქმით, პარტიის თავმჯდომარის ყოველი გამოჩენა ოპონენტებს შიშის ზარს სცემს.
"უსკდებათ გული იმაზე თუ როდის და როგორ ჩაერთვება ბიძინა ივანიშვილი საარჩევნო კამპანიაში, მისი ყოველი გამოჩენა თავზარს სცემს ხოლმე ჩვენს ოპონენტებს . ჩვენი მთავარი დღის წესრიგი არის ის, რომ საზოგადოების სამსახურშ ვიყოთ " - ამბობს "ქართული ოცნების" წევრი რათი იონათამიშვილი.

ხელისუფლების ოპონენტების შეფასებით, ნდობა ივანიშვილის მიმართ იმდენად დაბალია, რომ უკვე აღარანაირი მნიშვნელობა არ აქვს ივანიშვილის აქტიურობას ან პასიურობას. ხელისუფლების ოპონენტები დარწმუნებულები არიან , რომ ეს იქნება არჩევნები , როდესაც მმართველი პარტია უპირობოდ დამარცხდება.
"ივანიშვილი იქნება პირველი ნომერი თუ საერთოდ არ გამოჩნდება საარჩევნო დროს, ის არის პასუხისმგებელი ქვეყნის უკუსვლაზე , დაქცევაზე, ადამიანის უფლებების დარღვევაზე, ნეპოტიზმზე, კორუფციაზე საქართველოში. რაც შეეხება მის მცდელობას , რომ თუ ის გადაწყვეტს იყოს პირველი ნომერი და თუ მას აქვს მოლოდინი, რომ იგი "ოცნების" სიას წინ წაწევს, მე ვფიქრობ, რომ ეს მოლოდინიც არ არის ადეკვატური, იმიტომ, რომ ივანიშვილის ნდობა გაფლანგულია" - ამბობს "ევროპული საქართველოს" წევრი, ირმა ნადირაშვილი.