სოფელ ტყვიავში, გუშინ დღის საათებში ირაკლი ოქრუაშვილის ნათესავს ეკატერინე ჩიხლაძეს ორსართულიანი სცხოვრებელი სახლი დაუწვეს. ეკატერინე ჩიხლაძე ,,ნიუ პოსტთან'' საუბრისას აცხადებს რომ სახლს ცეცხლი მეორედ მიზან მიმართულად წაუკიდეს:

,,გუშინ გორში ვიყავი, დამირეკეს შენი სახლი იწვისო, გაოგნებული დავრჩი დამწვარ სახლს კიდევ ცეცხლი როგორ მოუკიდეს-თქო, ჩამოვედი და ძალიან მძიმე სურათი დამხვდა ჩემი სახლი მთლიანად ცეცხლში იყო გახვეული და მეხანძრეები ცდილობდნენ ჩაქრობას. 2011 წელსაც წაუკიდეს ჩემს სახლს ცეცხლი და სახლის ნაწილი გადაგვირჩა. მაშინ რაც გადარჩა დღეს დაიწვა, 1 ოთახი გადარჩა მხოლოდ. დილით რომ შევედი და ვნახე იქაც - ლოგინებზე, იატაკზე, დივანზე, ყველგან ბენზინია დასხმული. ორი აზრი არ არსებობს, სპეციალურად შემოვიდა ვიღაც და გადაწყვიტა მთლიანად გადაეწვათ ჩემი კარმიდამო. გამოძიება როგორც ჩანს მაშინაც და დღესაც ამ ვანდალიზმის ჩამდენს ხელს აფარებს. მეუბნებიან ვიცით ვინც არისო, მაგრამ ზემოდან მოსული არ უნდა გამოვიძიოთო და არ იძიებენ. აშკარაა, რომ ამ სოფლელია, რომელსაც შეუკვეთეს ჩემი სახლის დაწვა. მე ძალიან მწამს არსებული ხელისუფლების და არ მგონია ახლაც გამოუძიებელი დარჩეს ეს საქმე. ძალიან ვთხოვ ბატონ ივანიშვილს, ეკა ბესელიას, დამეხმარნონ ამ საქმის გამოძიებაში. აღნიშნული საქმის გახსნით ბევრი საქმე გაიხსნება. პროკურატურა შემიძლია დანამდვილებით გითხრათ რომ ამ საქმეს სპეციალურად არ ხსნის და დამნაშავეს ხელს აფარებს“, - აცხადებს „ნიუპოსტთან“ საუბრისას დაზარალებული.

შეგახსენებთ, რომ გუშინ გავრცელებული ინფორმაციის თანახმად, ჩიხლაძეების ოჯახი თავდაცვის ყოფილი მინისტრის, ირაკლი ოქრუაშვილის ახლობელია. ოჯახის უფროსი კი ოქრუაშვილის მინისტრობის პერიოდში ერთ-ერთ მაღალ თანამდებობას იკავებდა. სოსო ჩიხლაძე თავდაცვის სამინისტროს შესყიდვების სამსახურის ყოფილი უფროსია, ირაკლი ოქრუაშვილი კი სოსო ჩიხლაძის ბავშვის ნათლია.

გიორგი ახალკაცი "ნიუპოსტი" გორი