ნოტარიუს ბაჩანა შენგელიას საკითხზე “ევროპული საქართველო” იუსტიციის მინისტრს პარლამენტში იბარებს.

რეგლამენტის თანახმად, მინისტრი, უფლებამოსილია, ხოლო მოთხოვნის შემთხვევაში ვალდებულია, რეგლამენტით დადგენილი წესით დაესწროს კომიტეტის სხდომას, პასუხი გასცეს სხდომაზე დასმულ შეკითხვებს და წარმოადგინოს გაწეული საქმიანობის ანგარიში. ასეთ პირს კომიტეტმა მოთხოვნისთანავე უნდა მოუსმინოს, თუმცა დეპუტატს სერგი კაპანაძის თქმით, თეა წულუკიანი, არც სასამართლოს გადაწყვეტილებას ასრულებს და არც პარლამენტში არ მიდის, რითაც კანონს არღვევს.

"ევროპული საქართველოს" წევრმა, სერგი კაპანაძემ ბიუროს დღევანდელ სხდომაზე განაცხადა, რომ სასამართლოსა და აღსრულების ეროვნული ბიუროს გადაწყვეტილების მიუხედავად, იუსტიციის სამინისტრომ ბაჩანა შენგელიას სანოტარო საქმიანობასთან დაკავშირებულ პროგრამებთან წვდომა არ აღუდგინა, რითაც თეა წულუკიანი სისხლის სამართლის კოდექსს არღვევს. კაპანაძემ პარლამენტის თავმჯდომარესა მიმართა, რომ უზრუნველყოს მინისტრის მისვლა კომიტეტის სხდომაზე, ვინაიდან ეს მისი, როგორც პარლამენტის თავმჯდომარის პასუხისმგებლობაა.

ადამიანის უფლებათა დაცვის კომიტეტის თავმჯდომარემ სოფო კილაძემ განაცხადა, რომ როცა მინისტრის მოწვევის შესახებ ფრაქცია “ევროპული საქართველოს” განცხადება შევიდა კომიტეტში, 2 დღით ადრე თეა წულუკიანი პლენარულ სესიაზე იმყოფებოდა და დეპუტატებს შეეძლოთ, მისთვის ნებისმიერი კითხვა დაესვათ.

“მე რამდენადაც ვიცი, გარკვეული ტექნიკური თემებია, რაც უშუალოდ მინისტრს შეიძლება, არ ეხებოდეს. დარწმუნებული ვარ, კანონი აუცილებლად აღსრულდება და სასამართლოს გადაწყვეტილებაც კანონით დადგენილ ფარგლებში იქნება აღსრულებული. მე მესმის, რომ ქალბატონი თეა წულუკიანი თქვენი პარტიისგან ყოველთვის განსაკუთრებული თავდასხმის საგანი ხდება იმიტომ, რომ ზოგადად თქვენი დამოკიდებულებაა გამორჩეულ ლიდერებზე თავდასხმა. ამ ჯერზეც, მე მგონი, ასეთ თემასთან გვაქვს საქმე და იმიტომ ესხმით თავს ქალბატონ თეას, რომ ის გამორჩეული ლიდერია და საკმაოდ ენამახვილურად გიგებთ ხოლმე დებატებში”, – უთხრა კილაძემ კაპანაძეს.

"ევროპული საქართველოს" წევრმა, სერგი კაპანაძემ კი აღნიშნა, რომ ადამიანის უფლებათა კომიტეტის თავმჯდომარე იმ ადამიანის დაცვის ნაცვლად, რომლის უფლებებიც დაირღვა მინისტსრს იცავს.

“მინისტრი კი არ იყო წინა სესიაზე მოსული, პრემიერ-მინისტრი იყო და ქალბატონი თეაც იქ იჯდა. ეს კითხვები მას დავუსვით, ოღონდ პასუხი არ გაგვცა. მე რა ფაქტიც ახლა მოვიყვანე, სასამართლოს გადაწყვეტილების შეუსრულებლობასთან დაკავშირებით, მოხდა მაგის შემდეგ. იმის მერე გავიდა ერთ კვირაზე მეტი. არსებობს ძალაში შესული სასამართლოს გადაწყვეტილება, რომელიც არ სრულდება თქვენი გამოჩეული პოლიტიკური ლიდერის მიერ და თქვენ, ადამიანის უფლებათა დაცვის კომიტეტის თავმჯდომარე, ნაცვლად იმისა, რომ იცავდეს იმ ადამიანის უფლებას, ვის მიმართაც ეს არშესრულებული ბრძანება ადამაინის უფლებას არღვევს, იცავთ მინისტრს. პარლამენტში მინისტრის მოსვლა არის დადგენილი კანონით. მოვითხოვეთ ისე, როგორც ეს არის გათვალსწინებული კანონით და პროცედურებით. ის არ მოდის – ერთი მხრივ, კანონს არღვევს ღიად, მეორე მხრივ, არ მოდის პარლამენტში. ამიტომ კიდვ ერთხელ გთხოვთ, მათ შორის პარლამენტის მუნდირის დასაცავად, იქნებ უზრუნველყოთ , რომ ამ სესიის ფარგლებში თქვენი გამოღჩეული პოლიტიკური ლიდერი მოაბრძანოთ პარლამენტში და კიდევ ერთხელ მისცეთ საშუალება, რომ ოპოზიციას მოგვიგოს ენამახვილური საუბრებითაც და შინაარსითაც”, – განაცხადა სერგი კაპანაძემ.

სოფო კილაზემ სერგი კაპანაძეს აღნიშნული კომენტარის შემდეგ განუცხადა, რომ იუსტიციის მინისტრის პარლამენტში მისვლა ოპოზიციისთვისვე იქნება საზიანო.

“მე გითხარით, რომ ტექნიკური საკითხებია, რომელიც შეიძლება პირდპაირ ქალბატონ მინისტრს არ უკავშირდბეოდეს. თუ რჩევას მიიღებთ, ქალბატონი თეას აქ მოსვლა თქვენთვისვე იქნება საზიანო. ამას პოლიტიკურად ვამბობ და არ ვამბობ როგორც კომიტეტის თავმჯდომარე, იმიტომ რომ ჩვენ ვიცით, როგორ სრულდება ქალბატონი თეას აქ მოსვლა, ამიტომ ამ შემთხვევაში მე, როგორც ადამიანის უფლებათა კომიტეტის თავმჯდომარე, თქვენ გინდობთ ადამიანურად”, – მიმართა კილაძემ ოპოზიციონერ დეპუტატს.