დაჭრა თბილისში - დაკავებულია "ქართული ოცნების" დეპუტატის შვილი

სამართალი - 20:32, 11 Jul, 2020

1644

"ტვ. პირველის" ეთერში გასული სიუჟეტის შემდეგ, სადაც საუბარი იყო იმაზე, რომ 23 წლის მაკაკაცს თავზე 6 ჭრილობა მიაყენეს, შინაგან საქმეთა სამინისტრომ 2 პირი დააკავა.

არსებული ინფორმაციით, დაკავებულია "ქართული ოცნების" მაღალჩინოსნის შვილი.

აღსანიშნავია, რომ შსს-ს ოფიციალურ განცხადებაში, არ არის საუბარი ვინ არის დაკავებულის მამა და რატომ დუმდა ამდენი ხნის განმავლობაში საგამოძიებო ორგანო.

დანაშაული სავარაუდოდ ჩადენილია 24 ივნისს. აღსანიშნავია, რომ ჟურნალისტური გამოძიების ფარგლებში "ტვ. პირველმა" მსხვერპლის მამა ფარულად ჩაწერა.
გადაცემის აბტორი, ნოდარ მელაძე ყვება, რომ ანონსის გასვლის შემდეგ, მას 23 წლის დაზარალებული ბიჭის მამამ დაურეკა და მოითხოვა, მასალა ეთერში არ გაეშვათ, რასაც ჟურნალისტი არ დათანხმდა.

გთავაზობთ შინაგან საქმეთა სამინისტროს ოფიციალურ განცხადებას:

"2020 წლის 24 ივნისს, შინაგან საქმეთა სამინისტროს თბილისის პოლიციის დეპარტამენტის ვაკე-საბურთალოს მთავარი სამმართველოს პოლიციის მე-7 სამმართველოში დაიწყო გამოძიება 1997 წელს დაბადებული გ.ე.-ს ჯანმრთელობის დაზიანების ფაქტზე, დანაშაული გათვალისწინებული სსკ-ის 117-ე მუხლის პირველი ნაწილით.

2020 წლის 10 ივლისს ერთ-ერთი ტელეკომპანიის ეთერში გავიდა ანონსი იმის შესახებ, რომ აპირებდნენ მომხდარი ფაქტის გაშუქებას. ვინაიდან პირდაპირ ეთერში გაჟღერდა მომხდარი დანაშაულის შესახებ და შეიქმნა საფრთხე საქმეში გამავალი პირების მიმალვის, მიღებულ იქნა გადაწყვეტილება აღნიშნული პირების დაკავების შესახებ.

"შინაგან საქმეთა სამინისტროს თბილისის პოლიციის დეპარტამენტის ვაკე-საბურთალოს მთავარი სამმართველოს თანამშრომლებმა, ჩატარებული ოპერატიული, სამძებრო და საგამოძიებო მოქმედებების შედეგად, თბილისში, 2000 წელს დაბადებული გ.კ. დააკავეს სისხლის სამართლის კოდექსის 117-ე მუხლით გათვალისწინებული დანაშაულის ჩადენისთვის.

ამავე საქმესთან დაკავშირებით, 1997 წელს დაბადებული დ.ჟ. სისხლის სამართლის კოდექსის 126-ე და 238- პრიმა მუხლით გათვალისწინებული დანაშაულისთვის, ასევე, თბილისში დააკავეს.

აღნიშნულ საქმესთან დაკავშირებით, 2000 წელს დაბადებული დ.კ. პოლიციის განყოფილებაში პირადი ინიციატივით გამოცხადდა. საქმეზე დამატებითი მტკიცებულებების მოპოვებისა და დანაშაულში მონაწილე სხვა პირთა გამოვლენის მიზნით ტარდება კომპლექსური ოპერატიულ-საგამოძიებო მოქმედებები"- ნათქვამია განცხადებაში.