პარტია „ლელო საქართველოსთვის" წევრებმა ბრიფინგი გამართეს და ის ფაქტი განიხილეს, რომ სამართალდამცველებმა პარტიის წევრები საოკუპაციო ხაზთან მდებარე სოფელში არ შეუშვეს.

გორის ორგანიზაციის წევრები საოკუპაციო ხაზთან მდებარე სოფელ დიცში საარჩევნო კამპანიის ფარგლებში მოსახლეობას უნდა შეხვედროდნენ. სოფლის შესასვლელთან საქართველოს შსს-ს საპოლიციო საგუშაგოზე ისინი შეაჩერეს და სოფელში აღარ შეუშვეს.

,,ორსაათნახევრის განმავლობაში ვცდილობდით, შევსულიყავით სოფელ დიცში, მაგრამ, სამწუხაროდ, არ მოგვცეს უფლება და ვერც ვერანაირი არგუმენტი ვერ გვითხრეს, რატომ არ გვიშვებდნენ აღნიშნულ სოფელში. ეს არის პოლიტიკური დევნის კლასიკური მაგალითი. ხედავენ, რომ “ლელოს” აქვს მზარდი რეიტინგი, ძლიერდება და ხელისუფლებას ეშინია, რომ დაკარგავს სადავეებს. ამიტომ, მე მინდა, პირდაპირ მოვუწოდო ჩვენს ხელისუფლებას და ვუთხრა, რომ ჩვენ არავისი გვეშინია. ჩვენ მოვდივართ სუფთა ხელებით, ყველა სოფელში შევალთ და ყველგან ჩავატარებთ საარჩევნო კამპანიას, მათ შორის სოფელ დიცშიც და ქართველ ხალხთან ერთად დავასრულებთ ამ ხელისუფლების სამარცხვინო “მოღვაწეობას", - განაცხადა ,,ლელოს" გორის ოფისის ხელმძღვანელმა პაპუნა კობერიძემ.

,,ლელოს" წევრის, იურისტ კახა კოჟორიძის თქმით, აღნიშნული ფაქტი არის პოლიტიკური საქმიანობის ხელის შეშლა და ის არ გამორიცხავს, რომ აღნიშნულის გამო პარტიამ პროკურატურას მიმართოს.

,,დავაკვირდებით, რა რეაგირება ექნებათ და მოგვცემენ თუ არა განმეორებით იქ შესვლის უფლებას. თუ კიდევ მივიღებთ უარს, არ გამოვრიცხავ, რომ ჩვენ შევიტანთ პროკურატურაში გამოძიების დაწყების მოთხოვნით განცხადებას ოფიციალურად, პარტიის სახელით. სისხლის სამართლის კოდექსის თანახმად, პოლიტიკური საქმიანობისათვის ხელის შეშლა არის დანაშაული, რადგან პოლიტიკური პარტიის წევრებს არ აძლევენ ამომრჩეველთან მისვლის უფლებას", - განაცხადა კახა კოჟორიძემ.

“ქართული ოცნების“ გარდა, ვერც ერთი პოლიტიკური გაერთიანება ვერ წარმართავს სწორ, თანაბარ და თანასწორ წინასაარჩევნო კამპანიას გამყოფ ხაზთან მდებარე სოფლებში, - ეს განცხადება პარლამენტის ყოფილმა წევრმა, ,,ლელოს" პოლიტიკური საბჭოს წევრმა სოსო ვახტანგაშვილმა გორის ოფისში ბრიფინგის მსვლელობისას გააკეთა.