"ქართულ ოცნებაში“ განგაშის ზარები უნდა შემოკრან" - გიორგი კანდელაკი აშშ-ს კონგრესის გადაწყვეტილებაზე

პოლიტიკა - 13:10, 10 Jul, 2020

465

აშშ-ს კონგრესის გადაწყვეტილებას, რომლის მიხედვითაც საბიუჯეტო კომიტეტმა საქართველოსთვის ფინანსური დახმარების 15%-ის გაყინვას მხარი დაუჭირა, "ევროპული საქართველოს" წევრი, გიორგი კანდელაკი ეხმაურება.

კანდელაკი საქართველოსთვის სტრატეგიული პარტნიორის მხრიდან სანქციების მიღებას საგანგაშო პოლიტიკურ აქტს უწოდებს .

„ამ პოლიტიკური აქტის მნიშვნელობა იმდენად დიდია, რომ „ქართულ ოცნებაში“ განგაშის ზარები უნდა შემოკრან. ეს უკვე დიდი პრობლემაა ჩვენი ქვეყნისთვის. მთავარი ამ რამდენიმე პუნქტში არის მე-5 პუნქტი, რაც ეხება ოლიგარქიულ მმართველობას. ის აზრი, რაც აქამდეც იყო ჩამოყალიბებული და ძალიან გავრცელებული ვაშინგტონში, რომ ოლიგარქიული, არაფორმალური მმართველობა, ანუ როცა რეალური ძალაუფლება არის პირის ხელში, რომელიც არ იკავებს არც ერთ ფორმალურ თანამდებობას, არის ცუდი, უკვე არამხოლოდ გავრცელებული აზრია, არამედ არის საკანონდებლო დონეზე, ქაღალდზე ჩამოყალიბებული. ეს არ არის პირველი შემთხვევა, როდესაც ჩვენი ქვეყნის მთავრობას საკუთარი თავიც და ქვეყანაც სასაცილო და ტრაგიკომიკურ ვითარებაში ჩაუგდია არაკომპეტენტურობით, აგდებული დამოკიდებულებით და შეთქმულების თეორიების ძიებით. მითუმეტეს, ჩვენ მოკავშირეებთან და იმ პოლიტიკოსებთან, რომელიც წლების განმავლობაში საქართველოს სუვერენიტეტისთვის ხმალამოღებული იბრძოდნენ და ასეთები არიან სწორედ ის ფიგურები, რომლებიც აკრიტიკებენ ივანიშვილს შეერთებული შტატების კონგრესში“- ამბობს "ევროპული საქართველოს" წევრი, დეპუტატი გიორგი კანდელაკი.