"თავის არეში მომხვდა რაღაც, კიდევ რამდენიმე ადამიანი მირტყამდა" - პირველი ჩხუბი საბედისწერო წვეულებაზე და ახალი დეტალები შაქარაშვილის საქმიდან

სამართალი - 12:27, 03 Jul, 2020

1233

19 წლის ფეხბურთელის, გიორგი შაქარაშვილის საქმეში ახალი დეტალები გახდა ცნობილი. იუბილარის მეგობარი, ნახალოვკაში მცხოვრები ახალგაზრდები ჩვენებაში საბურთალოელებთან მომხდარ დაპირისპირებაზე საუბრობენ.

ნ.ხ.-ს ჩვენებაში ნათქვამია, რომ მათ საბურთალოელები შეურაცხყოფას აყენებდნენ და აგრესიულ ქმედებებს ჰქონდა ადგილი. ამის შემდეგ ახალგაზრდა შენობას ტოვებს, მაგრამ მას აგრესიული ახალგაზრდები უკან მიყვებიან და პირველი დაპირისპირებაც აქედან ხდება.

"იქ მყოფი ჩემთვის უცნობი რამდენიმე პიროვნება იქცეოდა გამომწვევად და აგრესიულად, როგორც ჩემ ასევე ჩემი მეგობრის მიმართ, კერძოდ ისროდნენ რეპლიკებს ჩვენი მისამართით და საუბრობდნენ ჩვენზე დამცინავი ტონით, ხოლო რა იყო მათი ასეთი ქმედების მიზეზი ჩემთვის უცნობია. ამის შემდეგ რადგან დარბაზში ძალიან ცხელოდა მე მარტო გავედი შენობის გარეთ ეზოში,რა დროსაც ეზოში მე ვიყავი მარტო. ჩემი ეზოში გასვლიდან დაახლოებით 10 წუთში ეზოში ასევე გამოვიდნენ დარბაზში მყოფი ის ბიჭებიც, რომლებიც დარბაზში დამცინავად ლაპარაკობდნენ ჩვენზე და იქცეოდნენ გამომწვევად ჩვენს მიმართ. ამის შემდეგ რამდენიმე წუთში ეზოში გამოსულმა ბიჭებმა , როდესაც დამინახეს და მოვიდნენ ჩემთან, რა დროსაც ჩვენ ერთმანეთთან შევლაპარაკდით, რა დროსაც ჩვენს შორის მოხდა სიტყვიერი კონფლიქტი, რა დროსაც მე იქ ვიყავი მარტო.

მე გადავედი გზაზე და ჩამოვჯექი ზ/ აღნიშნული კიბეების დაახლოებით მეორე თუ მესამე საფეხურზე. სადაც ასევე მოვიდნენ ის პიროვნებები, რომელთაგან ერთი დაჯდა ჩემს წინ, ხოლო დანარჩენები ჩემს გარშემო დაახლოებით ერთ მეტრის რადიუსში იდგნენ ფეხზე.მე და იმ პიროვნებამ რომელიც იჯდა ჩემს წინ გავაგრძელეთ საუბარი, ლაპარაკის დროს აღნიშნული პიროვნება იქცეოდა ჩემს მიმართ აგრესიულად, რა დროსაც მე მას ვეპასუხებოდი და ვცდილობდი მისთვის პასუხის გაცემას. ამ დროს უეცრად უკანა მხრიდან ჩემგან მოულოდნელად თავის არეში მომხვდა რაღაც, რის შემდეგ ჩემს წინ მდგომმა პიროვნებამაც დამარტყა ხელი სახის არეში და იმავე დროს მე ვიგრძენი, რომ კიდევ რამდენიმე ადამიანი მირტყამდა , ამ დროს მე თავზე და სახის არეში ავიფარე ხელები და ვცდილობდი დარტყმისაგან თავის დაცვას, ამავე დროს მე წამოვედი კიბეებიდან და ჩავედი გზაზე რა დროსაც იქ უცბათ მოვიდა ჩემი მეგობარი ვახო ჩიქოვანი რომელმაც კითხა იქ მყოფ პირებს რა ხდებაო, ხოლო მოსვლისთანავე იქ მყოფმა პიროვნებებმა ვახოსაც დაუწყეს ცემა" - წერს არასრულწლოვანი ჩვენებაში .