სახელმწიფო დეპარტამენტი: საქართველოს დემოკრატიული განვითარების მთავარი ტესტი იქნება სამართლიანი არჩევნები

პოლიტიკა - 18:36, 29 Jun, 2020

1158

აშშ საქართველოს საკონსტიტუციო ცვლილებების მიღებას ულოცავს. სახელმწიფო დეპარტამენტი ცვლილებების მესამე მოსმენით დამტკიცებას სპეციალური განცხადებით ეხმაურება და საქართველოს პარლამენტს მოუწოდებს საარჩევნო რეფორმა ეუთო/ოდირის რეკომენდაციების საფუძველზე გაატაროს.

"ამერიკის შეერთებული შტატები საქართველოს მიესალმება ისტორიულ მიღებას საკონსტიტუციო ცვლილებებისა, რომელიც უფრო პროპორციულ საარჩევნო სისტემას უზრუნველყოფს. 8 მარტს პოლიტიკური პარტიების უდიდესი ნაწილის მიერ მიღწეული შეთანხმების შედეგი, ეს საკონსტიტუციო ცვლილებები ხელს შეუწყობს მეტ სტაბილურობას და მრავალფეროვნებას საქართველოში ოქტომბრის საპარლამენტო არჩევნებისთვის.

ჩვენ დაჟინებით მოვუწოდებთ საქართველოს პარლამენტს, მიიღოს საარჩევნო კანონმდებლობა, რომელიც სრულად ასახავს ეუთო/ოდირის რეკომენდაციებს, და საქართველოს ხელისუფლებას, ეფექტურად განახორციელოს ეს კანონმდებლობა. როგორც საკვანძო ტესტი საქართველოს დემოკრატიული განვითარებისთვის, ჩვენ დაველოდებით თავისუფალ, სამართლიან და გამჭვირვალე საარჩევნო პროცესს, რომელიც ქართველი ხალხის არჩევანს გამოხატავს. წინასაარჩევნო და არჩევნების შემდგომი პროცესის სამართლიანობა ისეთივე მნიშვნელოვანია, როგორც უშუალოდ არჩევნების დღე.

აშშ გააგრძელებს საქართველოს ძალისხმევის მხარდაჭერას დემოკრატიის, საარჩევნო პრაქტიკის და კანონის უზენაესობის გაძლიერების კუთხით, ისევე, როგორც საქართველოს ევრო-ატლანტიკური მისწრაფებების მხარდაჭერას, რაც ერთ-ერთი საუკეთესო იარაღია რუსეთის აგრესიისგან თავის დასაცავად". - ვკითხულობთ სახელმწიფო დეპრტამენტის განცხადებაში.